1 maýsymnan bastap Qazaqstanda ne ózgeredi
ASTANA. KAZINFORM – Jazdyń alǵashqy aıy qazaqstandyqtar úshin birqatar mańyzdy jańalyqtarmen bastalmaq. 1 maýsymnan bastap Qazaqstanda zeınetaqy júıesi, memlekettik qyzmetterdi tsıfrlandyrý jáne jastardy baspanamen qamtý salalarynda birqatar mańyzdy ózgerister kúshine enedi.
Zeınetaqy jınaǵyn sheshýdiń erejesi ózgeredi
Qazaqstanda zeınetaqy jınaǵynyń eń tómengi jetkilikti shegin anyqtaýdyń jańa tártibi bekitildi. Jańa erejege sáıkes, bul kórsetkishti esepteý kezinde jyldyq tabystylyq mólsherlemesi 9% deńgeıinde, al aı saıynǵy tólemderdiń jyl saıynǵy ósimi 8% kóleminde esepke alynady. Eń tómengi jetkilikti shek arnaıy formýla arqyly anyqtalady.
PMDx0 = 12 × PVx0 × äx0
● x0 – salymshynyń jasy;
● PV – aı saıynǵy eń tómengi tólem mólsheri;
● ä – zeınet jasyna jetkennen keıin ómir boıy tólenetin tólemderdiń búgingi qunyn esepteýge arnalǵan koeffıtsıent.
Jańa qujat boıynsha, jetkiliktilik shegi aldyńǵy jylǵy deńgeıden tómen bolmaýy tıis jáne ol ınflıatsııa deńgeıinen 5 paıyzdyq tarmaqqa joǵary mólshermen qaıta eseptelip otyrady. Jańa qaýly resmı jarııalanǵannan keıin 10 kúnnen soń, ıaǵnı 4 maýsymda kúshine enedi.
Jyljymaıtyn múlik qujattary tolyq onlaın formatqa kóshedi
1 maýsymnan bastap jyljymaıtyn múlikke arnalǵan tehnıkalyq pasporttar men kadastrlyq pasporttardyń telnusqalary tek onlaın formatta rásimdeledi. HQKO operatorlary arqyly bul qujattarǵa ótinim qabyldaý tolyǵymen toqtatylady.
Endi azamattar eGov.kz portaly nemese eGov mobile mobıldi qosymshasy arqyly úıden shyqpaı-aq ótinim berip, tólem jasap, daıyn qujatty jeke kabınetinen júktep ala alady. Tsıfrlyq damý mınıstrligi bul qadam HQKO-lardaǵy kezekti azaıtý úshin jasalǵanyn, al onlaın qyzmetke múmkindigi joq azamattar HQKO-daǵy ózine-ózi qyzmet kórsetý aımaqtaryn paıdalana alatynyn jetkizdi.
Áskerı mindettiler jıynǵa shaqyrylady
Mamyr aıynda bastalǵan áskerı jıyndar maýsym aıynda da jalǵasyn tabady. Qazan aıyna deıin sozylatyn bul shaqyrtý sharasy aıasynda elimiz boıynsha 3 myńǵa jýyq áskerı mindetti azamat jınalady dep josparlanǵan.
Memlekettik qyzmetterdi kezeń-kezeńimen onlaın formatqa kóshirý boıynsha da qazirgi tańda ETsQ berý, turǵylyqty jeri boıynsha tirkeý, júrgizýshi kýáligin aýystyrý jáne avtokólikterdi bastapqy tirkeý sııaqty qyzmetter de tolyq tsıfrlandyrylǵan.
«Almaty jastary» baǵdarlamasyna ótinim qabyldaý bastalady
Almatyda jastarǵa arnalǵan jeńildetilgen turǵyn úı nesıesin usynatyn «Almaty jastary» baǵdarlamasyna bıyl 1-15 maýsym aralyǵynda ótinim qabyldanady. Ótinimdi kezekte.kz portalyndaǵy «Turǵyn úı servısteri» bóliminde ornalasqan «Almaty Jastary» servısi arqyly 1 maýsym saǵat 09:00-den 15 maýsym saǵat 18:00-ge deıin joldaýǵa bolady. Júıege kirý úshin elektrondyq tsıfrlyq qoltańba (ETsQ) qajet.
Baǵdarlama aıasynda qatysýshylarǵa mynandaı múmkindikter usynylady:
● Nesıe kólemi 20 mıllıon teńgege deıin;
● Jyldyq mólsherleme – 5%;
● Bastapqy jarna – 10%;
● Bastapqy jáne qaıtalama naryqtan baspana satyp alýǵa múmkindik beriledi.
Jobaǵa Almaty qalasynda turatyn 35 jasqa deıingi jastar qatysa alady.
Negizgi talaptary: Almaty qalasynda keminde bir jyl turaqty tirkeýde bolý, keıingi bes jylda úmitkerdiń jáne onyń otbasy músheleriniń atynda turǵyn úıdiń bolmaýy, sondaı-aq keminde alty aı resmı jumys ótili men mindetti zeınetaqy aýdarymdarynyń bolýy shart.
Baǵdarlama densaýlyq saqtaý, bilim berý, mádenıet, sport salalarynyń, JOO men ǵylymı-zertteý ınstıtýttarynyń mamandaryna, jýrnalısterge, áleýmettik sala, quqyq qorǵaý organdary men kommýnaldyq qyzmet qyzmetkerlerine arnalǵan.
Eski 2000 jáne 10 000 teńgelik banknottardyń aınalym merzimi aıaqtalady
Maýsym aıynda eski úlgidegi 2000 jáne 10 000 teńgelik banknottardyń parallel aınalym merzimi aıaqtalady:
● 2 000 teńgelik banknottar – 24 maýsymda;
● 10 000 teńgelik banknottar – 27 maýsymda aınalymnan shyǵady.
Osy merzimnen keıin eski banknottar tólem quraly bolýyn toqtatady, biraq olardy ekinshi deńgeıli bankter men «Qazposhta» arqyly taǵy 3 jyl boıy jańa úlgige aıyrbastaýǵa bolady.
Ulttyq banktiń aqparatyna sáıkes, 1 000 teńgelik eski banknottar 2027 jyldyń 27 naýryzyna deıin aınalymda bolady. Sondaı-aq 2025 jyldyń tórtinshi toqsanynda 500 teńgelik jańa úlgidegi banknotty shyǵarý josparlansa, 20 000 teńgelik jańa banknot 2026 jyly aınalymǵa engiziledi.
Astana – Shymkent baǵytynda jańa reıster ashylady
12 maýsymnan bastap Air Astana áýe kompanııasy Astana – Shymkent jáne Shymkent – Astana baǵyttary boıynsha jańa turaqty reısterdi iske qosady.
Qala ákimdiginiń málimetinshe, reıster aptasyna úsh ret – juma, senbi jáne jeksenbi kúnderi oryndalady.
Astanada elektr jaryǵynyń tarıfi ózgerýi múmkin
«Astana aımaqtyq elektrjelilik kompanııasy» bıylǵy 5 maýsymnan bastap elektr qýatynyń ortasha tarıfin 31,18 teńgeden 35,07 teńgege deıin ósirýdi usynyp otyr. Kompanııa basshylyǵynyń málimdeýinshe, buǵan elektr energııasyn satyp alý, tasymaldaý qunynyń qymbattaýy jáne ulttyq jelilerdiń qyzmet aqysynyń ósýi sebep bolǵan.
Jazda Qazaqstanda qosymsha poıyzdar men áýe reısteri iske qosylady
Jazǵy maýsymda jolaýshylar suranysyn óteý úshin Kólik mınıstrligi týrıstik baǵyttar boıynsha qatynasty keńeıtedi. 16 maýsymnan bastap Astana, Almaty, Qaraǵandy sekildi iri qalalardan Dostyq pen Balqash shıpajaılaryna qatynaıtyn 15 qosymsha poıyz marshrýty iske qosylady.
Bul jazda taǵy 550 myń qosymsha oryn ashýǵa múmkindik beredi. Sondaı-aq vagondar sany kóbeıedi. Poıyzdardaǵy vagon sany orta eseppen 19-21-ge deıin ulǵaıady.
Jańabaǵyt: 1 maýsymnan bastap Qaraǵandy – Balqash baǵytynda jańa poıyz qatynaıdy.
Áýe tasymaly boıynsha da Balqash, Úrjar jáne Úsharal baǵyttaryna aptasyna 7 reıske deıin qosymsha ushaqtar qoıylady.
Eń mańyzdysy – bul baǵyttardaǵy bılet baǵasy áleýmettik turǵydan qoljetimdi bolady jáne 16 myńnan 20 myń teńgege deıin saqtalady. Úkimet ishki týrıstik marshrýttardy sýbsıdııalaýǵa 6,4 mlrd teńge bólgen.
Eske sala keteıik, 2026 jylǵy maýsym aıynda elimizde qosymsha demalys kúnderi bolmaıdy, sebebi bul aıda memlekettik merekeler qarastyrylmaǵan.
