1 maýsymnan bastap Astana áýejaıy qalypty rejımde jumys istep jatyr
ASTANA. KAZINFORM — Astana halyqaralyq áýejaıy ushý-qoný jolaǵynda júrgizilgen josparly jóndeý jumystaryn aıaqtap, 1 maýsymnan bastap qalypty jumys rejımine qaıta oraldy.
Áýejaıdyń baspasóz qyzmeti habarlaǵandaı, qazirgi ýaqytta reıster áýe kompanııalarynyń kestesine sáıkes oryndalyp jatyr, al áýe kemelerine qyzmet kórsetý táýlik boıy tolyq kólemde júzege asyrylady.
Eske sala keteıik, aýqymdy jóndeý jumystary 2026 jylǵy 15 sáýir men 31 mamyr aralyǵynda júrgizildi. Osy kezeńde qajetti jumystardy oryndaý maqsatynda ushý-qoný jolaǵy kún saıyn saǵat 10:00–den 18:00–ge deıin ýaqytsha jabylyp, birqatar reıs tańǵy jáne keshki ýaqyttarǵa aýystyryldy.
— Jóndeý barysynda aerodrom qyzmetiniń mamandary ushý qaýipsizdigin qamtamasyz etýge jáne aerodrom ınfraqurylymynyń senimdiligin arttyrýǵa baǵyttalǵan keshendi jumystar atqardy. Іske asyrylǵan sharalar aerodromnyń paıdalaný tıimdiligin kúsheıtip, ushý qaýipsizdiginiń joǵary deńgeıin saqtaýǵa múmkindik berdi, — delingen habarlamada.
Osyǵan deıin Astana áýejaıy aýtızm spektrindegi balalarǵa beıimdelgen qyzmet engizgenin jazdyq.
