Prezıdenttik jastar kadr rezervine úmitkerlerdi bıyl qandaı synaq kútip tur
ASTANA. KAZINFORM – 1 maýsymda Prezıdenttik jastar kadr rezervine úmitkerlerdi irikteý bastalady. Osyǵan oraı Memlekettik qyzmet isteri agenttiginiń tóraǵasy Darhan Jazyqbaı BAQ ókilderine bıylǵy irikteý qalaı ótetinin aıtty.
Agenttik basshysynyń aıtýynsha, irikteý 6 negizgi sala boıynsha júrgiziledi. Olar:
- ınfraqurylym;
- ónerkásip jáne saýda saıasaty;
- agroónerkásiptik keshen jáne qorshaǵan orta;
- syrtqy saıasat jáne ınvestıtsııalar;
- ekonomıkalyq jáne qarjylyq saıasat;
- tsıfrlandyrý, áleýmettik saıasat jáne azamattyq qoǵam.
Kandıdat alǵash tirkelgende atalǵan salalyq baǵyttardyń birin tańdaýy qajet.
Bıyl osy 6 baǵyttyń árqaısysynda kandıdattardyń sany birkelki bolý úshin irikteýdiń árbir kezeńinde proportsıonaldy eksheý ótkizý josparlanyp otyr. Darhan Jazyqbaı bıylǵy irikteýdiń basty ereksheligi osy ekenin aıtady.
- Rezervtiń ár salalyq baǵyty boıynsha kvotalar qarastyrylyp, irikteý sol salalyq baǵyt boıynsha ǵana júrgiziledi. Bul ádis salalar arasyndaǵy teńgerimdi qamtamasyz etip, naqty baǵyttar boıynsha úmitkerlerdi irikteýdi qamtamasyz etedi, - dedi ol.
Darhan Jazyqbaıdyń sózine qaraǵanda, úmitkerlerge qoıylatyn talaptar ózgerissiz qalyp otyr. Demek irikteýge:
- jasy 35-ten aspaǵan;
- joǵary bilimi jáne 5 jyl jalpy jumys tájirıbesi bar;
- memlekettik tildi V1 deńgeıinen tómen emes dárejede meńgergen;
- Qazaqstan Respýblıkasynyń azamaty qatysa alady.
Rezerv múshesi bolý úshin úmitker 6 kezeńnen turatyn keshendi irikteýden ótýge tıis.
Birinshi kezeńdegi mátindik jáne sandyq aqparatpen jumys isteý qabiletin baǵalaýǵa arnalǵan testik synaq proktorıng júıesimen, aýdıo jáne beınefıksatsııa súıemeldeýimen ótedi.
- Osylaısha ádildik pen ashyqtyq qamtamasyz etiledi. Bul rette sandyq testileýge ár salalyq baǵyt boıynsha eń kóp ball jınaǵan kandıdattardyń 50%-y jiberiledi, - deıdi agenttik tóraǵasy.
Ekinshi sıtýatsııalyq tapsyrmalardy sheshý kezeńinde kandıdattar ózi tańdaǵan salalyq baǵyttaryna baılanysty naqty problemalardy sheshý qabiletin pash etýi kerek. Bul kezeń onlaın-rejımde esse jazý formatynda ótedi.
Úshinshi kezeń úmitkerdiń psıhologııalyq, kásibı erekshelikterin anyqtap, adam áleýetin baǵalaýǵa arnalǵan. Bul assessment synaǵy offlaın formatta, Prezıdent janyndaǵy memlekettik basqarý akademııasynda ótedi. Munda úmitkerler toptyq jáne jeke tapsyrmalar oryndaıdy.
Tórtinshi kezeńde kásibı HR-menedjerler úmitkerlermen onlaın formatta jeke suhbat ótkizedi.
Besinshi kezeńde sarapshylar komıssııasy úmitkerlermen suhbattasý túrinde áńgimelesý ótkizedi. Onyń qorytyndysy boıynsha Ulttyq komıssııa otyrysyna 100-den aspaıtyn kandıdattar tizimi usynylady.
Altynshy kezeńde ulttyq komıssııa solardyń ishinen úzdik 50 kandıdatty iriktep, olar Prezıdenttik jastar kadr rezervine qabyldanady.
Іrikteý ashyq ári ádil ótý úshin kandıdattardy baǵalaý nátıjeleri olardyń jeke kabınetine jiberilip, ár kezeńniń qorytyndysy resmı saıtta jarııalanady.
Darhan Jazyqbaı el múddesine qyzmet etemin degen belsendi jas azamattardy Prezıdenttik jastar kadr rezervine qatysýǵa shaqyrdy.
- Bilimdi, eńbekqor, otanǵa qyzmet etýdi paryz sanaıtyn jastar – elimizdiń turaqty damýynyń basty qozǵaýshy kúshi. Jastardyń bilimin, áleýeti men kúsh-jigerin el ıgiligi úshin tıimdi paıdalaný, qoǵamdyq múddelerge negizdelgen kásibı memlekettik qyzmetshilerdiń jańa býynyn qalyptastyrý – Agenttik jumysynyń basty baǵyttarynyń biri, - dedi agenttik basshysy.
Qujattardy qabyldaý – 1-30 maýsym aralyǵynda pkrezerv.gov.kz resmı platformasynda onlaın rejımde iske asady. Іrikteýdiń obektıvtiligin qamtamasyz etý úshin kandıdattardyń derekteri jeke nómir arqyly jasyrylady. Osylaısha baǵalaýshylar úmitkerdiń kim ekenin bilmesten, nómir boıynsha saralap, baǵalaıdy.
Agenttik tóraǵasynyń aıtýynsha, 2019, 2021 jáne 2023 jyldary ótken irikteýlerge 60 myńnan astam qazaqstandyq qyzyǵýshylyq tanytyp, sonyń ishinen 400 adam qabyldanǵan.
- Búginde olardyń 318-i jaýapty qyzmetterge taǵaıyndalyp, ekonomıkanyń túrli salalarynda elimizdiń damýyna óz úlesterin qosyp otyr. Atap aıtqanda, 167-si ortalyq memlekettik organdarda, 37-si jergilikti atqarýshy organdarda, 62-si ulttyq kompanııalarda, 52-si ózge uıymdarda qyzmet istep júr. Sondaı-aq, rezervke alynǵan 39 maman saıası laýazymdarda, 3 adam «A» korpýsynyń laýazymdarynda jumys isteıdi. 2 Májilis depýtaty, 1 bir máslıhat depýtaty bar, - dedi Darhan Jazyqbaı.
Eske salsaq, 2024 jyldyń 1 naýryzynan bastap oblystardyń, respýblıkalyq mańyzy bar qalalardyń jáne astananyń óńirlik kadr rezervterine irikteý bastalǵanyn jazǵan edik.