1 maýsym memlekettik mereke retinde belgilenýi múmkin
ASTANA. KAZINFORM — 1 maýsym — «Balalardy qorǵaý kúni» memlekettik mereke retinde belgileýdi múmkin. Bul týraly Májilis depýtattarynyń saýalyna Eńbek jáne halyqty áleýmettik qorǵaý mınıstri Svetlana Jaqypovanyń jaýabynda aıtylǵan.
— «Halyqaralyq balalardy qorǵaý kúni» dástúrli túrde 1 maýsymda atap ótiledi. Bul kúni kóptegen elde balalardyń ómirin jaqsartýǵa baǵyttalǵan qaıyrymdylyq aktsııalary ótkiziledi. Balalardyń quqyqtaryn qamtamasyz etý taqyrybyndaǵy mańyzdy jáne ózekti máseleler talqylanady. Búkil álem balalarynyń aldynda turǵan ótkir problemalar kóteriledi. Balalardyń ózderi úshin 1 maýsym demalystyń bastalýymen, demalý, kóńil kóterý, qyzyqty istermen aınalysý múmkindigimen baılanystyrylady, — dedi mınıstr jaýabynda.
Onyń atap ótýinshe, ádette bul kúni ata-analar balalardy attraktsıondar saıabaǵyna, oıyn ortalyqtaryna serýendeýge aparady jáne jalpy merekelik kóńil-kúıdi uıymdastyrady.
— Atalǵan mereke ata-analar men balalarǵa birlesip ýaqyt ótkizýge, mádenı, tárbıelik jáne qoǵamdyq is-sharalarǵa qatysýǵa múmkindik beredi. Bul balanyń jaqsy psıhoemotsıonaldy jaǵdaıda otbasynyń janynda tolyq qaýipsizdikti sezinýine áserin tıgizedi. Joǵaryda aıtylǵandardyń negizinde, sonymen qatar elimizde otbasy ınstıtýty men otbasylyq qundylyqtardy nyǵaıtý maqsatynda 1 maýsym — «Balalardy qorǵaý kúnin» memlekettik mereke retinde belgileýdi múmkin dep sanaımyz, — dedi Svetlana Jaqypova.
Aıta keteıik, bul data Áıelderdiń halyqaralyq demokratııalyq federatsııasynyń kongresinde 1949 jyly resmı túrde bekitildi. 1950 jyldan beri búkil álem osy kúndi balaǵa qamqorlyq kúni retinde atap ótip keledi.