1 maýsym memlekettik mereke bola ma - Úkimet jaýaby

ASTANA. KAZINFORM – Qazir Úkimet 1 maýsym — balalardy qorǵaý kúnin memlekettik mereke retinde belgileý máselesin talqylap jatyr.

- Merekeler men demalys kúnderi azamattardyń ótinishi, túrli uıymdardyń demalys kúnderin belgileýge qatysty usynystary negizinde belgilenedi. Basqa memlekettermen, ásirese ekonomıkalyq damýy joǵary eldermen salystyrǵanda, bizde mundaı merekelerdiń sany jetkilikti. Bul shynymen de belgili bir áserin tıgizip otyrǵan bolar. Meniń oıymsha, óndirisi úzdiksiz júretin kásiporyndar báribir jumysyn jalǵastyrady. Árıne, mereke kúnderi bul kásiporyn ákimshiligi zańnamaǵa sáıkes qyzmetkerlerge qosymsha tólem tóleýi tıis. Al bul kúnderi jumys istegenderge qosymsha demalys nemese eńbek demalysyna qosymsha kúnder berilýi qajet, - dedi Premer-mınıstrdiń orynbasary Ermek Kósherbaev Úkimet úıinde ótken baspasóz máslıhatynda.

Odan ári vıtse-premer 1 maýsym halyqaralyq balalar kúnin resmı mereke dep jarııalaýǵa qatysty oıyn ortaǵa saldy.

- Bul merekege qatysty másele birneshe ret talqylandy. Sebebi bul boıynsha ótinish óte kóp tústi. Odan bólek energetıka salasynyń qyzmetkerleri júginip jatyr. Kópshilik bul kúndi demalys kúni etip belgileý kerek dep sanaıdy, - dep tolyqtyrdy Úkimet basshysynyń orynbasary.

Odan bólek balalar kúni merekesin resmı etýge qatysty Eńbek jáne halyqty áleýmettik qorǵaý birinshi vıtse-mınıstri Asqarbek Ertaev pikir aıtty.

- El boıynsha jalpy 10 memlekettik mereke bar. Mereke kúnderine qatysty kez kelgen usynys memlekettik organdarmen qaralyp, kelisý arqyly sheshiledi. 1 maýsymǵa qatysty rasynda da usynys boldy, qazir memlekettik organdarmen, sarapshylarmen talqylaý júrip jatyr. Onyń qorytyndysy boıynsha nátıjesin qosymsha habarlaımyz. Talqylaý qyrkúıekke deıin aıaqtalady, - deıdi mınıstrdiń orynbasary.

Eske salaıyq, buǵan deıin 1 maýsym memlekettik mereke retinde belgilenýi múmkin ekendigi týraly habarlaǵan edik.