1 mamyrdan bastap telefon baılanysy qyzmetteriniń baǵasy kóteriledi - «Qazaqtelekom» AQ
ASTANA. 19 sáýir. QazAqparat - Bıylǵy 1 mamyrdan bastap ámbebep qyzmetke jańa tarıfter engiziledi. Bul týraly «Qazaqtelekom» AQ-nyń baspasóz qyzmeti habarlap otyr.
«Telekommýnıkatsııanyń ámbebap qyzmetterine tarıfterdi qaıta balanstaý josparyn jáne telekommýnıkatsııanyń ámbebap qyzmetteriniń tarıfterin bekitý týraly» Qazaqstan Respýblıkasy Kólik jáne kommýnıkatsııa mınıstrliginiń Baılanys jáne aqparattandyrý komıtetiniń 2012 jylǵy 12 sáýirdegi № 2 buıryǵyn (budan ári - Buıryq) oryndaý úshin 2012 jylǵy 1 mamyrdan bastap telekommýnıkatsııanyń ámbebap qyzmetterine jańa tarıfter engiziledi. Buıryq telekommýnıkatsııanyń ámbebap qyzmetterine tarıfterdi qaıta balanstaýdyń kezekti kezeńin ótkizý aıasynda shyǵaryldy.
Buıryqqa sáıkes 2012 jylǵy 1 mamyrdan bastap jergilikti telefon baılanys qyzmetteri tólemin ýaqytpen esepteý júıesine kóshirilgen/kóshirilmegen negizgi bir telefon apparaty úshin aı saıynǵy abonenttik tólem kóteriledi: qalalyq jáne aýyldyq jerlerde turatyn abonentter úshin 20%-ǵa.
Aıtalyq, jergilikti telefon baılanystary qyzmetteri tólemin ýaqytpen esepteý júıesine kóshirilmegen negizgi telefon úshin aı saıynǵy abonenttik tólem qalada - 624,00 teńgeden (QQS-syz) 748,80 teńgege (QQS-syz) deıin, aýylda - 414,30 teńgeden (QQS-syz) 497,16 teńgege deıin (QQS-syz) joǵarylaıtyn bolady. Qalada jergilikti telefon baılanystary qyzmetteri tólemin ýaqytpen esepteý júıesine kóshirilgen negizgi telefon úshin aı saıynǵy abonenttik tólem 309,40 teńgeden (QQS-syz) 371,28 teńgege (QQS-syz) deıin kóteriledi; jekemenshik tájirıbemen aınalysatyn notarıýstar, advokattar jáne jeke kásipkerler - abonentteri úshin de 20%-ǵa ósedi.
Máselen, jergilikti telefon baılanysy qyzmetteri tólemin ýaqytpen esepteý júıesine kóshirilmegen negizgi telefon úshin aı saıynǵy abonenttik tólem 746,61 teńgeden (QQS-syz) 895,93 teńgege (QQS-syz) deıin, jergilikti telefon baılanysy qyzmetteri tólemin ýaqytpen esepteý júıesine kóshirilgen negizgi telefon úshin 597,29 teńgeden (QQS-syz) 716,75 teńgege (QQS-syz) deıin joǵarylaıdy.
Sonymen qatar telekommýnıkatsııanyń keıbir ámbebap qyzmetterine tarıfter qoldanystaǵy deńgeıde saqtalatyn bolady.
