1 mamyrdan bastap erikti zeınetaqy jarnasyn esepke alý úshin shot avtomatty túrde ashylady

NUR-SULTAN. QazAqparat - 2021 jyldyń 1 mamyrynan erikti jarna boıynsha jeke zeınetaqy shotyn ashýǵa BJZQ-ǵa túsken alǵashqy erikti zeınetaqy jarnasy (EZJ) negiz bolyp tabylady, dep habarlaıdy QazAqparat Biryńǵaı jınaqtaýshy zeınetaqy qorynyń baspasóz qyzmetine silteme jasap.

«Erikti zeınetaqy jarnasy salymshynyń – jeke tulǵanyń óz kirisinen óziniń paıdasyna aýdarǵan somasy ne salymshynyń (jeke nemese zańdy tulǵanyń) alýshynyń paıdasyna aýdarǵan somasy bolýy múmkin. Bul rette jarnalardyń mólsheri men merzimdiligin salymshy ózi aıqyndaıdy.

Atap ketý kerek, jeke tulǵa óz kirisinen óziniń paıdasyna EZJ aýdarǵan kezde salyq zańnamasynda tólengen EJZ somasyna salyq shegerimi qarastyrylǵan», delingen habarlamada.
Budan bólek, 2021 jyldyń 1 qańtarynan bastap salyq agentiniń (jumys berýshiniń) jeke qarajaty esebinen jumyskerdiń paıdasyna tólegen EZJ-sy korporatıvti tabys salyǵyn tóleý kezinde shegerilimge jatady. Sol ýaqytta jumys berýshiniń jumyskerdiń paıdasyna tólegen EZJ somalary jumyskerdiń kirisine salyq salý kezinde esepke alynbaıdy.
«Osylaısha jumys berýshi óz jumyskerleriniń paıdasyna EZJ tóleı otyryp, salyq salý kezinde jeńildikterge, sondaı-aq, óz qyzmetkerlerin yntalandyrýda qosymsha quralǵa ıe bolady. Jumysker úshin bul BJZQ-da EZJ esebinen qalyptasqan zeınetaqy jınaqtary somasynyń ósýi, sáıkesinshe, Qordan tólenetin zeınetaqy tólemderi mólsheriniń kóbeıýi retinde oń sıpat alady», delingen habarlamada.
Erikti zeınetaqy jarnalaryn ekinshi deńgeıdegi bankiler (EDB) ne «Qazposhta» AQ bólimsheleri arqyly aýdarýǵa bolady. Ekinshi deńgeıdegi birqatar bankiler EZJ onlaın (mobıldi qosymsha nemese ózin-ózi qyzmet kórsetý termınaldary) arqyly aýdarýǵa múmkindik beredi. Budan bólek, óz paıdasyna EZJ jarnalaryn turaqty aýdarý úshin jumys berýshiniń atyna ótinish jazýǵa da bolady. Sonyń negizinde jumys berýshi EZJ ótinish ıesiniń ne úshinshi tulǵanyń paıdasyna BJZQ-ǵa turaqty túrde aýdaryp otyrady.
Bul rette paıdasyna EZJ aýdarylyp turatyn jeke tulǵany sáıkestendirý, EZJ tóleý barysynda elektrondyq formattaǵy tólem tapsyrmasynda kórsetilgen jeke derekteri (aty-jóni, JSN, týǵan kúni) boıynsha oryndalatyn bolady. Jeke basyn kýálandyratyn qoldanystaǵy qujattyń derektemeleri, turǵylyqty mekenjaıy, ózge de derekteri týraly barlyq qajetti málimetti BJZQ memlekettik organdardyń aqparattyq júıesinen alady.