1 mamyrdan bastap elimizde tegin shyǵarmashylyq jáne sporttyq sharalarǵa qatysty jańa tetik engiziledi

NUR-SULTAN. QazAqparat – 2021 jyldyń 1 mamyrynan elimizde balalar men jasóspirimderge arnalǵan tegin memlekettik shyǵarmashylyq jáne sporttyq tapsyrystardy engizý tetigi iske qosylady, dep habarlaıdy QazAqparat tilshisi.

QR Mádenıet jáne sport mınıstrliginiń málimetinshe, memlekettik shyǵarmashylyq jáne sporttyq tapsyrystardy júzege asyrý jergilikti atqarýshy organdarǵa júktelgen.

Al memlekettik tapsyrystardyń operatory retinde Nur-Sultan, Almaty, Shymkent qalalarynyń,oblystardyń mádenıet jáne sport basqarmalary bekitilgen.

«Memlekettik shyǵarmashylyq jáne sporttyq tapsyrystardyń jetkizýshisi retinde kez-kelgen jeke kásipker ne zańdy tulǵa bolýy múmkin. Onyń menshik formasy mańyzdy emes. Bastysy, zańmen bekitilgen merzimde sapaly qyzmet kórsetilý qajet. Al qyzmet alýshy - 4-17 jasqa deıingi balalar, olardyń múddesin zańdy ókilderi qorǵaıdy. Qabyldanǵan erejeler vaýcherlik júıe sekildi jumys isteıdi. Oǵan sáıkes, balalar arasyndaǵy bos oryndar, olardyń kezegine sáıkes, menshikti vaýcherdiń berilýi arqyly tańdaǵan qyzmet kórsetýshisine bólinedi», - dedi mınıstrlikten.

Balalar kontıngentin toltyrý, basqa da qyzmet kórsetýshiniń, operator men balanyń zańdy ókiliniń fýnktsıonaldyq qosalqy qyzmetteri, osyǵan qatysty protsesster qyzmet kórsetýshi men balanyń zańdy ókiline tegin negizde júzege asyrylady. Sondaı-aq, erejede shyǵarmashylyq úıirmeler men sporttyq sektsııalardyń jumys isteýine qatysty, onyń ishinde ǵımarattardy jabdyqtaýǵa baılanysty arnaıy talaptar kózdelgen. Memlekettik shyǵarmashylyq jáne sporttyq tapsyrystardy jetkizip berýshilerdi irikteý kezinde ashyqtyqty qamtamasyz etý, shyǵarmashylyq úıirmeler jáne sporttyq sektsııalarǵa baratyn balalardyń kezegin saqtaý, jáne osyǵan qatysty barlyq protsedýralardyń durys júrýi elektrondy formatta, birikken aqparattyq júıe negizinde júzege asyrylady.

Búginde QR Mádenıet jáne sport mınıstrligi QR Tsıfrlyq damý, ınnovatsııa jáne aeroǵarysh ónerkásibi, QR Bilim jáne ǵylym mınıstrlikterimen birlesip, «Bala» aqparattyq júıesin daıyndap jatyr. Ol atalǵan tetik protsesin avtomattandyrýǵa múmkindik beredi.

28 sáýirden bastap elimizdiń birneshe óńirinde, atap aıtsaq, Qaraǵandy jáne Pavlodar oblystarynda aqparattyq júıeni aprobatsııadan ótkizý bastalyp ketti. 29 sáýirden «Bala» aqparattyq júıesine elimizdiń oblys ortalyqtary men respýblıkalyq mańyzy bar qalalarda qosyldy.