1 mamyr kúni elordadaǵy «Qazaq eli» monýmenti alańynda halyqtyq serýen ótedi
Basty merekelik shara dástúr boıynsha «Qazaq eli» monýmentiniń aldyndaǵy alańda ótedi. Bul týraly Mádenıet basqarmasynan habarlady, dep jazady elorda ákimdiginiń resmı saıtynda. «Qazaq eli» monýmentiniń aldyndaǵy alańdaǵy merekelik sharalar 3 sahnada uıymdastyrylady. Saǵat 11.00-14.00 aralyǵynda negizgi sahnada shyǵarmashylyq ujymdardyń 700 astam ártisi óner kórsetedi. Merekelik dýmannyń basty 5 nómiri uıymdastyrylmaq: «Qazaqstan Halqynyń bıi», «Qazaqstan daýysy» etno-akapellalyq nómiri, «Otan daýsy osyndaı», «Qazaqstan bolashaǵy» jáne «Qazaqstan halqynyń birligi kúni-2014» ánurany». Sharada jetekshi bı ujymdary, atap aıtqanda, «Naz» memlekettik bı teatry, Óskemen qalasynyń «Flesh» shoý-baleti, «Ushqyn» Qaraǵandy bı ansambli, Shymkent qalasynyń «Shamsınýr» jáne «Aıgólek» bı ansamblderi, sondaı-aq TMD memleketterinen «Vaınah» bı ansambli (Sheshenstan Respýblıkasy), Omby bı jáne án ansambli, Tbılısı qalasynyń grýzındik ulttyq hory, Ankara qalasynyń túrik ulttyq hory óz sheberlikterin ortaǵa salady. Sonymen qatar, kontsertke shetel men Qazaqstannyń jeke aspapta oryndaýshylary - Zıther (Germanııa), Madan Oak (Úndistan), Chjý (Qytaı) jáne Qorlan Kartenbaeva (Qazaqstan) qatysady. Baǵdarlama otandyq estrada juldyzdarynyń qatysatyn merekelik kontsertpen jalǵasady. Al shaǵyn sahnada saǵat 10.00-17.00 aralyǵynda elordalyq etnomádenı birlestikter ózderiniń kontserttik baǵdarlamalaryn kópshilik nazaryna usynady. Baǵdarlamaǵa 23 etnomádenı birlestikten 400-den astam adam qatysady. Sonymen qatar sporttyq saıystar ótkizýge arnalǵan alańdar ornatylady. Onda arqan tartý, armrestlıng, kir tasyn kóterý, toǵyzqumalaq t.b. sporttyq jarystar ótedi, al 15 saýda ornynda azyq-túlikterdiń bólshek saýdasy júrgiziledi. Elordalyq meıramhanalarda merekege qatysýshylarǵa arnap dastarhan jaıylady, túrli ulys ókilderiniń ulttyq taǵamdary usynylady. Astana qalasynyń basty alańynda ótetin merekelik sharaǵa 100 000 astam adam qatysady, dep kútilýde.
