1 qyrkúıekten mysyq pen ıtti esepke qoıyp, chıpteý mindetti bolady

ASTANA. QazAqparat – «Janýarlarǵa jaýapkershilikpen qaraý týraly» QR Zańyna sáıkes, bıyl 1 qyrkúıekten bastap mysyqtar men ıtterge chıp taǵý jáne olardy arnaıy esepke qoıý mindetti bolady, dep habarlaıdy QazAqparat tilshisi.

Al úı janýarlarynyń basqa túrlerin, ıaǵnı egeýquıryq, homıak nemese mını-pıgterdi (ergejeıli úı shoshqasy – avtor túsindirmesi) esepke alý erikti negizde júrgiziledi.

Qazaqstandyqtar úshin elektrondyq júıege janýarlary týraly aqparatty engizý – tegin. Degenmen chıp taǵý úshin mysyq pen ıt ıeleri óz qaltasynan aqsha tóleýi tıis. Ony óteýge múmkindigi joq áleýmettik osal toptaǵy azamattarǵa qyzmet túri tegin bolmaq.

Energyprom.kz portalynyń aqparatyna saı, elimizdiń iri qalalarynda mysyqtar men ıtterge chıp taǵý qyzmetiniń baǵasy 3,5-8 myń teńge aralyǵynda.