1 qyrkúıekten Qazaqstanda jer qoınaýyn paıdalaný quqyǵy elektrondy konkýrs arqyly beriledi

NUR-SULTAN. QazAqparat - 2020 jyldyń 1 qyrkúıeginen Qazaqstanda jer qoınaýyn paıdalaný quqyǵy elektrondy konkýrs arqyly beriledi. Bul týraly búgin Energetıka mınıstrliginiń alqa otyrysynda vedomstvo basshysy Nurlan Noǵaev aıtty, dep habarlaıdy QazAqparat tilshisi.

«2020 jyldyń 1 qyrkúıeginen bastap jer qoınaýyn paıdalaný quqyǵy elektrondy konkýrs arqyly beriledi. Tıisti zań jobasyn Parlament depýtattary qoldap, oǵan Memleket basshysy qol qoıdy. Bul óz kezeginde jer qoınaýyn paıdalanýshylardy tańdaýda, olardyń múmkinshiligin, áleýetin eskerýde ashyqtyqty qamtamasyz etetindigine senimiz mol», - dedi ol.

Mınıstr dereginshe, 2019 jyly 260 jer qoınaýyn paıdalanýshy kompanııa geologııalyq barlaý jumystaryna 158 mlrd teńge jumsady.

«Aıta keterligi, 260 kelisimsharttyń tek 167-inde ǵylymı-zertteý jáne tájirıbelik-konstrýktorlyq jumystarǵa shyǵyndarynyń 1 paıyzyn jumsaý jóninde mindettemesi bar. Qazirgi tańda muny qalǵan mekemelerge de tapsyrý jóninde jumys júrgizilip jatyr. Bul bólingen qarajatty munaı óndirý kezinde jańa tehnologııalardy, tehnıkany paıdalanýǵa jumsaý jónindegi Úkimet basshysynyń tapsyrmasy bar. Ony Aqparat, Tsıfrlyq damý mınıstrlikterimen oryndap jatyrmyz», - dedi N.Noǵaev.