1 qyrkúıekten bastap mektepter mańynda polıtsııa jasaqtarynyń tyǵyzdyǵy artady - ІІM
Bul týraly ІІM Ákimshilik polıtsııa komıteti tóraǵasynyń orynbasary Jandos Muratálıev mınıstrliktiń aqparat alańynda ótken onlaın brıfıngide aıtty.
«Bıyl 1-shi qyrkúıekten bastap bilim berý mekemeleriniń mańynda polıtsııa jasaqtarynyń tyǵyzdyǵy artady. Bilim berý mekemeleriniń janyndaǵy jol jelisi tek is-shara kezinde ǵana emes, turaqty túrde tekseriletinin aıta ketý kerek. Sondaı-aq, balalar men jasóspirimderdi tasymaldaýǵa arnalǵan kólik quraldaryna kóp kóńil bólinedi. Bıyl bizdiń qyzmetkerler oqý oryndaryna tıesili 2 myńǵa jýyq kólikti tekserdi. Anyqtalǵan kemshilikterdi joıý úshin tıisti mekemelerge 100-den astam uıǵarym joldanǵan», - deıdi ІІM ókili.
Onyń aıtýyna qaraǵanda, balalardy jol-kólik jaraqattarynan qorǵaý máselesinde oqý protsesi de mańyzdy qyzmet atqarady.
«Bilim jáne ǵylym mınıstrliginiń uıymdastyrýymen bilim berý uıymdarynda júıeli túrde, oqý jospary aıasynda jolda júrý qaǵıdalary boıynsha oqytý qarastyrylǵan. Óz kezeginde polıtsııa qyzmetkerleri mektep oqýshylaryna jol júrisi qaǵıdalaryn úıretý boıynsha onlaın formatta myńnan astam konkýrstar men vıktorınalar ótkizdi. 1-shi qyrkúıekten bastap bul baǵyttaǵy jumys dástúrli formatta jalǵasyn tabady dep senemiz», - dedi Jandos Muratálıev.
