1 qyrkúıekten bastap kolledj stýdentteriniń stıpendııasy 50% artady

ASTANA. QazAqparat – Jańa oqý jylynan bastap kolledj stýdentteriniń stıpendsııasy taǵy 50 paıyzǵa ósedi. Bul týraly Oqý-aǵartý mınıstri Ǵanı Beısembaev málim etti, dep habarlaıdy QazAqparat tilshisi.

«Memleket basshysynyń tapsyrmasy boıynsha tehnıkalyq jáne kásiptik bilim berýge memlekettik tapsyrysty ulǵaıtý jumystary belsendi júrip jatyr. Bıyl atalǵan salaǵa 133 myń grant bólindi. Onyń 60% tehnıkalyq mamandyqtarǵa baǵyttaldy. Sondaı-aq, 1 qyrkúıekten bastap kolledj stýdentteriniń stıpendııasy ótken jylǵy deńgeıden 50%-ǵa artady», - dedi Ǵanı Beısembaev Úkimet otyrysynda.

Mınıstrdiń málimdeýinshe, básekege qabiletti kadrlardy daıarlaý maqsatynda, mindetti jumysqa ornalastyrý talabymen 10 myń oryn bólindi.

«410 kolledjdi kásiporyndar óz qamqorlyǵyna alyp otyr. Aıta ketsek, birqatar óńirde tehnıkalyq jáne kásiptik bilim berýdi damytýda oń nátıje bar. Máselen, Almaty qalasynda tehnıkalyq jáne kásiptik bilimdi damytý boıynsha 2023-2030 jyldarǵa arnalǵan «Jol kartasy» ázirlendi. 600 kolledj pedagogy sheteldik taǵylymdamadan ótedi. Dýaldy oqytý sheńberinde tálimgerlik ınstıtýtyn damytý, 1200 oryndyq eki kolledj jáne jataqhana salý jospary bar», - deıdi vedomstvo basshysy.