1 qyrkúıekten bastap Qazaqstannyń barlyq mektepterinde aǵylshyn tili oqytylady - B.Jumaǵulov
ASTANA. 19 maýsym. QazAqparat - Búgin QR Bilim jáne ǵylym mınıstri Baqytjan Jumaǵulovtyń tóraǵalyǵymen elimizde alǵash ret «QR-daǵy kóptildi bilim berý: damytý strategııasy» atty respýblıkalyq keńes ótti.
«Búgingi keńestiń maqsaty kóptildi oqytý boıynsha strategııalyq máselelerdi tallqylaý. Birinshiden, bıylǵy jyldyń 1 qyrkúıeginen bastap Qazaqstannyń barlyq mektepterinde aǵylshyn tili oqytylatyn bolady. Ekinshiden, rektorlardy jınap otyrǵan sebebimiz qazirgi ýaqytta qaı ýnıversıtette qandaı is-sharalar ótkizilip jatqandyǵyn bilý», - dedi jıyndy ashqan B.Jumaǵulov.
Sondaı-aq óz sózinde QR Bilim jáne ǵylym mınıstri álemge belgili basylymdardyń eńbekterine jazylyp, oǵan 1 mlrd. 200 mln. teńge qarajat bólgendigin atap ótip, biraq ta ony oqıtyn stýdentter sanynyń tym tómen ekendigine qynjylys bildirdi. «Qazaqstan stýdentteriniń 1 paıyzǵa jýyǵy ǵana atalǵan eńbekterdi paıdalana alady eken. Bul degeniń - óte tómen kórsetkish. Osy jaǵynan oılanýymyz kerek», - dedi ol.
Aıta keteıik, qazirdiń ózinde til úıretý ortalyqtaryn damytý jumystary júrgizilýde. Elimiz boıynsha 33 mektepte oqý úsh tilde júrgiziledi. Sonymen qatar keıbir jekelegen joǵary oqý oryndarynda mańyzdy mamandyqtar boıynsha kóptildi bilim berý isi qolǵa alynǵan.
