1 qyrkúıekte respýblıkada «Abaılańyz - balalar!» jedel-aldyn alý sharasy bastalady
ASTANA. 31 tamyz. QazAqparat - QR Іshki ister mınıstrligi 1-5 qyrkúıek aralyǵynda balalardyń jol-kólik oqıǵalarynan jaraqattanýynyń aldyn alý maqsatynda respýblıkalyq «Abaılańyz - balalar!» jedel aldyn alý sharasyn ótkizedi.
Statıstıkaǵa qaraǵanda, jańa oqý jyly bastalǵan kezde mektep oqýshylarynyń qatysýymen jol apattary shuǵyl artyp ketedi.
QR ІІM Jol polıtsııasy komıtetiniń baspasóz baıanynda habarlanǵanyndaı, balalardyń qatysýymen bolatyn jol-kólik oqıǵalarynyń 80 paıyzǵa jýyǵy júrgizýshiler kinásinen bolady - zardap shekken balalardyń jartysynan kóbi avtokólikter jolaýshylary bolǵan.
Aktsııa aýqymynda jol polıtsııasynyń qyzmetkerleri mektepter men balabaqshalarda taqyryptyq sabaqtar júrgizip, balalardy jol boıynda qaýipsiz bolý daǵdylaryna úıretedi. Qaýipsizdik sharalaryn saqtaý jóninde júrgizýshilermen bólek áńgime ótkiziledi. Budan basqa, bilim berý mekemeleriniń janynda kóshe-jol jelisine keshendi tekserýler uıymdastyrylady.
Jedel-aldyn alý sharalary barysynda jol-kólik apattarynan zardap shekken balalarǵa ońaltý kómegin kórsetý maqsatynda densaýlyq saqtaý, bilim berý, qaıyrymdylyq uıymdarymen birlesip, psıhologııalyq, medıtsınalyq ortalyqtar bazalarynda «JKO-da zardap shekken balaǵa kómektes» aktsııasyn ótkizý josparlanǵan, bul sharalarǵa ata-analar men jol apattarynyń qatysýshylary bolǵan balalar shaqyrylady.
Jol-kólik jaraqattarynyń aldyn alýǵa baǵyttalǵan basqa da birqatar sharalar josparlanǵan.
