1 qyrkúıekte QR ulttyq ulany el mektepterinde erlik sabaǵyn ótkizedi
ASTANA. QazAqparat - «Qazaqstan joly - 2050: Bir maqsat, bir múdde, bir bolashaq» atty Memleket basshysynyń Qazaqstan halqyna Joldaýyn iske asyrý aıasynda jastarmen áskerge deıingi aqparattyq-nasıhattaý jumystaryn júrgizý sheńberinde 1 qyrkúıekte QR Ulttyq ulany mektepter men gımnazııalarda «Patrıotızm jáne erlik, beıbitshilik pen kelisim» atty ashyq sabaq ótkizedi.
Bul týraly QR Ulttyq ulanynyń baspasóz qyzmeti habarlady.
Aýqymdy respýblıkalyq aktsııany uıymdastyrýshylardyń jospary barlyq el boıynsha orta oqý oryndarynyń kópshiligin qamtıdy. Respýblıkanyń barlyq oblys ortalyqtaryna, iri qalalaryna jiberilgen Ulttyq ulannyń komandırleri men aǵa ofıtserleri joǵary synyp oqýshylarymen ata-babalarymyzdyń patrıotızmi, erlik isteri jaıynda áńgime ótkizedi. Oqýshylarǵa áskerı kásip, onyń adam ómirin qutqarýda ózin qurbandyqqa tigetin basty adamgershilik qasıeti jaıynda áńgimeleıdi. Jastarǵa qaýipti sátterde shynaıy erlik kórsetip, batyrlyq pen óz isiniń sheberi bola bilgen Ulttyq ulannyń áskerı qyzmetshileri jaıly derekti fılmder kórsetedi.
Ashyq sabaqtyń maqsaty - balalardyń sanasyna ózderinen basqa eshkim Otanǵa qorǵan bola almaıtynyn jetkizý. Eldiń keleshegi jastardyń qolynda ekenin, olardyń el damýynyń barlyq úrdisine yqpal etetin memleket, qoǵam kelesheginiń kirpishin qalaıtyn dińgegi ekenin uǵyndyrý.
Respýblıka astanasynda Bas qolbasshylyq ókilderi, Tárbıelik áleýmettik-quqyqtyq jumys bas basqarmasynyń jáne Astana garnızony bóliminiń tárbıelenýshi ofıtserleri qamqorlyqtaǵy mektepter men qala oqý oryndarynda oqýshylarmen jańa oqý jylynyń birinshi sabaǵynda kezdesedi.
