1 qyrkúıekte el aýmaǵynda aýa raıy qandaı bolady
NUR-SULTAN. QazAqparat - Sınoptıkter 1 qyrkúıekke arnalǵan aýa raıy boljamyn usyndy, dep habarlaıdy QazAqparat «Qazgıdromet» RMK baspasóz qyzmetine silteme jasap.
Atmosferalyq fronttar Qazaqstannyń shyǵys, ońtústik-shyǵys aımaqtaryna áser etedi. Sonyń saldarynan naızaǵaı jarqyldap, jańbyr jaýady.
Shyǵys Qazaqstan oblysynyń soltústik-shyǵysynda nóser jańbyr jaýady. Ońtústikte, shyǵysta, ońtústik-batysta jel kúsheıedi.
Ońtústik-batysta - shańdy daýyl, ońtústik-shyǵysta - burshaq, soltústik-shyǵysta jáne ortalyqta - tuman kútiledi.
Shyǵys Qazaqstan oblysynda naızaǵaı oınap, túnde jáne tańerteń soltústiginde tuman túsedi. Naızaǵaı kezinde jel ekpini 15-20 m/s deıin kúsheıedi.
Almaty oblysynyń soltústiginde jáne taýly aýdandarynda, Jambyl oblysynyń shyǵysynda jáne taýly aýdandarynda kún kúrkirep, burshaq jaýady. Jel qarqyny - 17-22 m/s.
Túrkistan oblysynyń taýly aýdandarynda naızaǵaı oınaıdy. Naızaǵaı kezinde jeldiń kúshi 15-20 m/s jetedi.
Qaraǵandy oblysynyń shyǵysynda kún kúrkireıdi, túnde jáne tańerteń soltústiginde tuman túsedi.
Pavlodar oblysynyń soltústik-batysynda jáne ońtústik-batysynda tuman túsedi.
Mańǵystaý oblysynyń soltústik-shyǵysynda shańdy daýyl kóteriledi.
Qostanaı, Aqmola oblystarynyń soltústiginde, Soltústik Qazaqstan oblysynyń soltústik-batysynda, Qaraǵandy oblysynyń soltústiginde jáne shyǵysynda topyraq betinde 2 gradýs úsik júredi.
Kúndiz Batys Qazaqstan oblysynda aptap ystyq bolady.
Mańǵystaý, Atyraý, Batys Qazaqstan, Aqtóbe, Túrkistan, Qyzylorda oblystarynda, Jambyl, Qostanaı, Almaty oblystarynyń basym bóliginde, Qaraǵandy oblysynyń batysynda, ońtústik-batysynda, Shyǵys Qazaqstan oblysynyń ońtústiginde, Aqmola oblysynyń batysynda, soltústik-batysynda, Pavlodar oblysynyń ortalyǵynda tótenshe órt qaýpi saqtalady.
