1 qyrkúıekte Ata-analardy pedagogıkalyq qoldaý ortalyǵy jumysyn bastaıdy
«Biz tárbıe jumysynyń rólin kúsheıtýge kóp kóńil bólemiz. Sondyqtan, bul jumysta biz úshin ata-analardyń qoldaýy óte mańyzdy. Osyǵan baılanysty bıyl 1 qyrkúıekten bastap barlyq bilim berý uıymdarynda Ata-analardy pedagogıkalyq qoldaý ortalyǵy jumysyn bastaıdy. Olardyń basty basymdyqtary – balalardy oqytý men tárbıeleýde otbasy men mekteptiń ózara is-qımyly boıynsha jumysty kúsheıtý jáne ata-analardyń pozıtıvti mádenıetin damytý. Ulttyq quryltaı otyrysynda Memleket basshysy bilim salasyna qatysty birqatar negizgi mindetterge toqtaldy. Atap aıtqanda, patrıotızmdi, bilimpazdyqty, naǵyz maman bolýdy, únemshildikti, eńbekqorlyqty qalyptastyrý», - dedi mınıstr Bilim salasy qyzmetkerleriniń respýblıkalyq tamyz keńesinde.
Onyń atap ótýinshe, «Ulttyq tárbıe – el bolashaǵy» tárbıesiniń tujyrymdamalyq negizderi engizilýde. 1 qyrkúıekten bastap 2023-2025 jyldarǵa arnalǵan Birtutas tárbıe baǵdarlamasyn iske asyrý bastalady.
Ol jalpy adamzattyq jáne ulttyq qundylyqtar negizinde óskeleń urpaqty tárbıeleý sapasyn arttyrýǵa baǵyttalǵan jáne 5 mln bilim alýshyny, sondaı-aq ata-analar men jurtshylyqty qamtıdy.
Bıyl alǵash ret bilim alýshylarmen tárbıe baǵdarlamasynda oqytý úshin Іshki ister, Tótenshe jaǵdaılar, Qorǵanys mınıstrlikteri men Ulttyq qaýipsizdik komıteti ókilderi tartylady.
«Biz oqý saýatynyń rólin kúsheıtýge, «Oqýǵa qushtar mektep» jobasy aıasynda kitap arqyly tárbıeleýge kóp kóńil bólemiz. Qazir bilim berý uıymdarynda kórkem ádebıet qory 3,7 mln danaǵa ulǵaıdy jáne júıeli túrde damı bermek. Sondaı-aq, Memleket basshysynyń tapsyrmasy boıynsha «Balalar kitaphanasy» jobasy iske asyp jatyr. Onyń sheńberinde mektep kitaphanalarynyń qoryn otandyq jáne álemdik ádebıettiń úzdik úlgilerimen tolyqtyrý josparlanýda. Bul joba ulttyq qundylyqtar negizinde balalardy tárbıeleýge jáne jalpy kitapqa degen qyzyǵýshylyqty oıatýǵa baǵyttalǵan», - dedi Ǵanı Beısembaev.
Ol buqaralyq sportty damytý jáne salaýatty ómir salty qaǵıdattaryn qalyptastyrý úshin mınıstrlik sporttyń 10 túri boıynsha mektep jáne stýdentter lıgalaryn, sondaı-aq qysqy, jazǵy gımnazıadany, respýblıkalyq kóp deńgeıli jarystar men týrnırler ótkizetinin aıtty.
«Toǵyzqumalaq, Asyq atý ulttyq sport túrlerin damytýdamyz. Tek bıyl ǵana Ulttyq mektep lıgasy aıasynda 2 mln-nan astam oqýshynyń qatysýymen 39 jarys ótkizildi, 800-ge jýyq oqýshy HІ qysqy gımnazıadaǵa qatysty», - dedi ol.
