1 qyrkúıekte 7 myń 690 mektep esikterin aıqara ashatyn bolady - B. Jumaǵulov
ASTANA. 14 tamyz. QazAqparat - Aldaǵy 1 qyrkúıekte elimizde 7 myń 690 mektep óz esikterin aıqara ashatyn bolady. Onda 2,5 mln.-ǵa tarta oqýshylar bilim alady.
Bul týraly búgin Úkimette ótken selektorlyq keńeste QR Bilim jáne ǵylym mınıstri Baqytjan Jumaǵulov málim etti.
Mınıstrdiń málimetine súıensek, 270 myńnan astam búldirshin mektep tabaldyryǵyn alǵash attap, 1-synypqa barady.
«Demografııalyq ósim men kóshi-qon úderisi qarqyn alyp otyrǵan jergilikti jerlerde 5 myń 170 balaǵa arnalǵan 10 mektep ashyldy. Bıyl 596 mektepke 20 mlrd. teńgeniń kúrdeli jóndeý jumystary qarastyrylsa, sonyń 80 paıyzynyń jumysy aıaqtaldy. Aǵymdaǵy jóndeý 5 myń 953 mektepke qarastyryldy. Olardyń daıyndyǵy 98 paıyzǵa jetti», - deıdi mınıstr. Onyń aıtýynsha, mektepterdiń jylytý maýsymǵa ázirligi de joǵary. Máselen, 6 myń 80 mektep derbes júıemen jylytylady. Bul rette otynmen qamtamsyz etý 70 paıyzdy quraıdy.
