1 qyrkúıekke deıin Aqmolada 2 jańa mektep paıdalanýǵa beriledi
KÓKShETAÝ. QazAqparat - 1-shi qyrkúıekke deıin Aqmola oblysynda 2 jańa mektep paıdalanýǵa beriledi. Taǵy úsheýin jyl sońyna deıin salyp bitirý josparlanǵan, dep habarlaıdy QazAqparat tilshisi oblystyq bilim basqarmasyna silteme jasap.
Vedomstvonyń deregi boıynsha, óńirde 1-shi qyrkúıekke daıyndyq jumystary qyzý júrip jatyr.
«Epıdemıologııalyq jaǵdaıǵa qaramastan, jańa mektepterdiń qurylysy men jóndeý jumystary bir sátke de báseńdemedi. 1-shi qyrkúıek qarsańynda Tselınograd aýdanynyń Qoıandy (1200 oqýshyǵa arnalǵan) jáne Qajymuqan (300 oqýshyǵa arnalǵan) aýyldarynda eki mektepte paıdalanýǵa berý josparlanyp otyr. Jyl sońyna deıin taǵy úsh mekteptiń qurylys aıaqtalýy tıis. Onyń ishinde ekeýi Tselınograd aýdynynyń Maksımovka (300 oryn) jáne Qaramendi (120 oryn) aýyldarynda, taǵy bireýi Kókshetaý qalasynda (392 oryn) salynyp jatyr», - deıdi bilim basqarmasynyń baspasóz qyzmetindegiler.
Vedomstvodan atap ótkendeı, budan bólek, Kókshetaý qalasynda úsh mekteptiń (№1, №6 orta mektepteri men №13 ekologııalyq mektep gımnazııasy) janynan jalpy 1320 oqýshyǵa arnalǵan qosymsha oqý korpýstary salynyp jatyr. Bul oblystaǵy 6 mektepte úsh aýysymda oqytý júktemesin azaıtady.
«Bulandy aýdanyndaǵy Altyndy orta mektebi jáne Býrabaı aýdanyndaǵy Abylaıhan atyndaǵy orta mektepterine kúrdeli jóndeý jumystary júrgizilýde. Sonymen qatar «Jumyspen qamtýdyń jol kartasy» baǵdarlamasy jáne «Aýyl - el besigi» jobasy sheńberinde 114 mektepte jóndeý jumystary qolǵa alynǵan», -dep tolyqtyrdy basqarmadan.
Aıta keteıik, osyǵan deıin habarlaǵanymyzdaı, Aqmola oblysynda 311 mektep oqý jylyn shtattyq rejımde bastaıtyn bolady.
