1 qyrkúıek kúni Kóktal-2 aýylynda jańa mektep ashylady

Bul týraly búgin «Mektepke jol» atty dástúrli sharanyń bastalýyna oraı uıymdastyrylǵan baspasóz máslıhaty barysynda Astana qalalyq bilim basqarmasynyń bastyǵy Ásıma Bımendına aıtty.

«1 qyrkúıekte memlekettik tilde bilim beretin mektep Kóktal-2 aýylynda ashylady. Qazirgi ýaqytta memlekettik komıssııa qabyldaý aktisine qol qoımaq. Іs júzinde mekteptiń qurylys jumystary tolyǵymen aıaqtaldy. Meniń oıymsha, Kóktal-1 aýylyndaǵy №41 mektepte úsh aýysymmen bilim berý joıylady», - dedi Á.Bımendına.

Sondaı-aq basqarma bastyǵynyń atap ótýinshe, jyl sońyna deıin Ilınka aýylyndaǵy jalpy orta bilim beretin mekteptiń de qurylysy aıaqtalyp, óz jumysyna kirisetin bolady. «Qazirgi ýaqatta ol mekteptiń qurylysyna baılanysty sot protsedýralary bolyp, bas merdigeri aýysqan edi. Degenmen qurylys jumystary aǵymdaǵy jyldyń sońyna deıin aıaqtalady. Al ázirshe Ilınka aýylynyń balalary burynǵy mektepterine bilim ala beredi. Biz olardy mektepke jetkizý úshin arnaıy kólik bóldik», - dedi ol.

Jalpy elordada 10 mektepte oqýshylardy avtobýspen tasymaldaý uıymdastyrylǵan.