1 kún qaldy: Almaty Kane Ýest kontsertine qalaı daıyndalyp jatyr

Kane Ýest nemese YE kontserti erteń, 14 tamyz saǵat 21:00-ge josparlanǵan. Alaıda jankúıerler úshin Ortalyq stadıon esikteri saǵat 16:00-den bastap ashyq bolady. Kontsertke 30 myńnan astam adam jınalady degen boljam bar.

Mundaı aýqymdy is-sharaǵa daıyndyq jumystary áldeqashan bastalǵan. Al búgin sol jumystardyń sońǵy tustary pysyqtalyp jatyr. Baıqaǵanymyzdaı, stadıonyń barlyq negizgi kireberisteri - Abaı dańǵylynan, Baıtursanov kóshesi jaǵynan jáne Sátbaev kóshesinen alańǵa kiretin joldar qorshalyp, tolyqtaı jabylǵan. Qazir olar arqyly tek uıymdastyrý jumystary qatysty bar jumysshylar men kúzet qyzmetkerleri ótip júr.

Stadıonnyń syrtqy jaǵynda jáne onyń aınalysyndaǵy kóshelerde YE kontsertine baılanysty bannerler ornatylǵan. Onda sektorlarǵa baılanysty aqparat bar. Odan bólek Abaı dańǵyly men Baıtursanov kóshesindegi kireberisterde LED-ekrandarǵa uqsas uzyn taqtaıshalar ornatylǵan. Munda erteń adamdar úshin qajetti aqparat kórsetilýi múmkin.

Sondaı-aq stadıonnyń aldyńǵy bóliginde (Abaı dańǵyly) resmı fan-dúken qurylǵan. Ol qazirdiń ózinde jumys istep tur jáne Kanege qatysty jazýy bar kıim-keshek pen ózge de zattardy alýǵa kelgen adamdardyń kezegi kóp.

Ortalyq stadıonnyń ishindegi basty ózgeris - munda jarty sharǵa uqsaıtyn sfera qurylǵan. Kane Ýest qaýipsizdik arqanyn beline taǵyp, osy shardyń tóbesinde óner kórsetetin bolady. Sonymen qatar stadıonnyń tórt jaǵynan bıik tehnıkalyq munalar qurylǵan. Olar alańǵa jaryq túsirýi tıis.

Buǵan deıin is-shara uıymdastyrýshylary kontsert ótkizýshi úshin Almatyǵa 100 tonna bolatyn qural-jabdyq jiberilgenin aıtty.

Qaýipsizdik pen polıtsııa eskertýi

Almaty qalasynyń Polıtsııa departamenti kórermenderdiń yńǵaıly kirýi úshin stadıonnyń úsh jaǵynan 40 kireberis qarastyrylǵanyn atap ótti. Sondaı-aq stadıonǵa kirer aldynda tekserý júrgiziletinin eskertip, aýmaqqa bılet nemese akkredıtatsııasy bar adamdar ǵana kire alatynyn eske saldy. Kontsert kúni polıtsııa kúsheıtilgen rejımde jumys isteıdi.

Odan buryn Almaty polıtsııasy álemdik juldyzdyń kontsertine baılanysty alaıaqtyq áreketteri bolýy múmkin ekenin habarlady. Áleýmettik jeliler men messendjerler arqyly «daıyn bılet» satý týraly usynystarǵa aldanbaýǵa, beıtanys adamdarǵa aqsha aýdarmaýǵa shaqyrdy.

Al uıymdastyrýshylar tarapy stadıonǵa alyp kelýge tyıym salynǵan zattardyń tizimin jarııalady. Olar: qarý-jaraq, esirtki, ishimdik, shyny ydystar, plastık bótelke, kesetin ne shanshıtyn zattar jáne t.b.. Sondaı-aq kontsertke kirip, biraq stadıonnan shyǵyp ketken adamdar alańǵa qaıta kire almaıtynyn eske saldy.

Avtobýstar men metro jumysy

Erteń myńdaǵan tyńdarman jınalatyn is-sharaǵa baılanysty qalada stadıon mańyndaǵy birneshe kósheni jabý josparlanǵan. Atap aıtqanda:

* Abaı dańǵyly Muqanov kóshesinen deıin Seıfýllın dańǵylyna deıin;

* Sátbaev kóshesi Baızaqov kóshesinen Seıfýllın dańǵylynan deıin;

* Baıtursynov kóshesi Shevchenko kóshesinen Tımırıazev kóshesine deıin jabyq bolady.

Atalǵan kóshe ýchaskelerinde kólik qozǵalysy 14 tamyz kúni saǵat 16:00–den 00:00–ge deıin shekteledi. Osy kezeńinde qoǵamdyq kóliktiń 32 baǵytynyń qozǵalys syzbasy ózgeredi.

Al is-shara aıaqtalǵannan keıin qonaqtardy qalanyń 6 baǵyty boıynsha 60 tegin shattl tasymaldaıdy. Kórermenderge qolaıly bolý úshin avtobýstar Ortalyq stadıonnan myna baǵyttarǵa qatynaıdy:

* Almaty Arena — 10 avtobýs;

* Raıymbek batyr / «Alataý» metro beketi — 10 avtobýs;

* Almaty-1 temirjol vokzaly — 5 avtobýs;

* «Orbıta» — 5 avtobýs;

* «Juldyz» shaǵyn aýdany — 10 avtobýs;

* Almaty halyqaralyq áýejaıy — 10 avtobýs.

Sonymen qatar qoǵamdyq kólik pen metropolıtenniń jumysy kúsheıtiledi. «Baıqońyr» metro beketi saǵat 21:00–de jolaýshylar úshin jabylady. Kontsertke kelýshilerge «Abaı» jáne «Muhtar Áýezov atyndaǵy teatr» beketterin paıdalaný usynylady. Metro jumysy keminde saǵat 01:00–ge deıin, al qajet bolǵan jaǵdaıda 03:00–ge deıin uzartylady.

Eske salaıyq, Almatyda Kane kontsertine jalǵan bılet satqan azamat anyqtaldy.