Qyzylordada kúrish alqaby 11 myń gektarǵa qysqaryp, ornyna dándik júgeri egildi
ASTANA.KAZINFORM - Qyzylorda oblysynda ylǵaldy kóp qajet etetin daqyldardyń egis alqaby 11 myń gektarǵa qysqartyldy.
Sý resýrstary jáne ırrıgatsııa mınıstri Nurjan Nurjigitov jumys saparymen Qyzylorda oblysyna baryp, óńirdegi vegetatsııa kezeńiniń ótý barysymen tanysty.
Oblys ákimdiginde mınıstr óńir basshysy Murat Ergeshbaevpen kezdesti. Taraptar sý sharýashylyǵy salasynyń qazirgi ahýalyn, vegetatsııa kezeńiniń ótýin, sý únemdeý tehnologııalaryn engizý jáne gıdrotehnıkalyq ınfraqurylymdy jańǵyrtý máselelerin talqylady.
Bıyl Qyzylorda oblysynda kúrish egisiniń kólemi byltyrmen salystyrǵanda 10,9 myń gektarǵa qysqaryp, 70 myń gektardy qurady. Qysqartylǵan kúrish alqaptarynyń ornyna 10 myń gektar jerge ylǵaldy az qajet etetin dándik júgeri egildi.
Sondaı-aq Qazaly aýdanynda salynatyn «Qaraózek» sý qoımasynyń qurylysy talqylandy. Bul nysan 31 myń gektar egis alqabyn jáne 120 myń gektar shabyndyq pen jaıylymdy sýmen qamtamasyz etedi. Joba Islam damý bankiniń qoldaýymen júzege asyrylady.
Oblys ákimimen kezdesýden keıin mınıstr Jalaǵash aýdanyna baryp, «Tań LTD» JShS-niń egistik alqaptaryn aralady. Kásiporyn jalpy 1995 gektar jerde aýyl sharýashylyǵy daqyldaryn ósiredi. Onyń 1861 gektary kúrish alqaptaryna tıesili. Sonymen qatar munda sý únemdeý sýarý júıeleri men zamanaýı agrotehnologııalar engizilip, egistik alqaptaryn lazerlik tegisteý jumystary júrgizilip jatyr.
Jalaǵash aýdanyndaǵy jalpy egis kólemi 41,8 myń gektardan asady. Bul ótken jylmen salystyrǵanda 5152 gektarǵa artyq. Qazirgi tańda aýyl sharýashylyǵy qajeti úshin josparlanǵan 638,32 mln tekshe metr sýdyń 406,4 mln tekshe metri alynǵan. Sonymen birge ekologııalyq turaqtylyqty saqtaý jáne jergilikti ekojúıelerdi qoldaý maqsatynda «Qaraózek» kanaly boıyndaǵy kólder júıesine sý jiberilip jatyr. Búginge deıin josparlanǵan 203 mln tekshe metr sýdyń 146,5 mln tekshe metri jiberildi.
Qarmaqshy aýdanynda mınıstr jalpy aýmaǵy 3363 gektardy quraıtyn «Jańa jol» JShS-niń egistik alqaptaryna baryp, sýarmaly jerlerge kanaldar arqyly sý jetkizý barysymen tanysty. Aýdandaǵy jalpy egis kólemi 25 myń gektardan asady. Onyń ishinde kúrish egistigi 11,5 myń gektardy quraıdy. Qazirgi ýaqytta josparlanǵan 522,3 mln tekshe metr sýdyń 323 mln tekshe metri alynǵan.
Fermerler sýarmaly sýdyń turaqty ári ýaqytyly jetkizilip jatqanyn aıtyp, vegetatsııa kezeńiniń sońyna deıin kanaldar arqyly beriletin sý kóleminiń saqtalatynyna senim bildirdi. Sondaı-aq olar sý resýrstaryn basqarý men bólýdi retke keltirý baǵytyndaǵy jumystary úshin mınıstrlikke jáne «Qazsýshar» RMK oblystyq fılıalyna alǵys aıtty.
— Vegetatsııa kezeńi bastalǵanǵa deıin mınıstrlik boljamdarǵa súıene otyryp, bıylǵy sýarý maýsymyna arnalǵan sý paıdalaný lımıtterin belgiledi. Klımattyń ózgerýi jaǵdaıynda bul shekteýlerdi qatań saqtaý, ylǵaldy kóp qajet etetin daqyldardyń egis kólemin qysqartý, egis qurylymyn ártaraptandyrý jáne sý únemdeý tehnologııalaryn engizý asa mańyzdy. Sýdyń tek aýyl sharýashylyǵyna ǵana emes, basqa da salalarǵa qajet ekenin umytpaýymyz kerek. Mysaly, Shardara sý qoımasynan sý balyq aýlaýdy qoldaý úshin jáne ekologııalyq maqsattarda, sonyń ishinde tabıǵatty qorǵaý jáne Soltústik Araldyń deńgeıin ustap turý úshin de paıdalanylady, — dedi Nurjan Nurjigitov.
Qarmaqshy aýdanynda ekologııalyq qajettilikter úshin 100 mln tekshe metr sý qarastyrylǵan. Onyń 60,4 mln tekshe metri búginge deıin alyndy. Sonymen qatar aýdanda jalpy uzyndyǵy 88,5 shaqyrym bolatyn 12 kanaldy betondaý josparlanyp otyr. Barlyq nysan boıynsha jobalaý-smetalyq qujat ázirlenip, memlekettik saraptamaǵa joldanǵan.
Aıta ketelik Respýblıka boıynsha egistikti sýarýǵa shamamen 6 mlrd tekshe metr sý alynǵan edi.
