1 qyrkúıekten bastap zeınetaqy tóleminiń tártibi ózgeredi
ASTANA. KAZINFORM — Úkimet 2025 jylǵy 18 tamyzdaǵy qaýlysymen zeınetaqy tólemderi men Biryńǵaı jınaqtaýshy zeınetaqy qoryna (BJZQ) jarnalardy ustaý tártibin retteıtin birqatar normatıvtik aktige ózgerister engizdi.
Túzetýler 2023 jyly bekitilgen erejelerge qatysty jáne maqsaty — zeınetaqy taǵaıyndaý rásimin jeńildetý, proaktıvti qyzmet kórsetýdi kúsheıtý jáne esep aıyrysý tártibin naqtylaý.
Negizgi ózgerister:
Tólemdi avtomatty túrde taǵaıyndaý
Biryńǵaı jınaqtaýshy zeınetaqy qory jyl saıyn 1 naýryzǵa deıin «Azamattarǵa arnalǵan úkimet» memlekettik korporatsııasymen derekterdi salystyryp otyrady. Bul zeınet jasyna jetken, biraq ótinish bermegen azamattarǵa tólemdi proaktıvti túrde taǵaıyndaýǵa múmkindik beredi. Qarajat alýshylardyń bank shotyna avtomatty túrde aýdarylady.
Elektrondyq ótinim
Biryńǵaı jınaqtaýshy zeınetaqy qory men memlekettik korporatsııa arasyndaǵy ózara is-qımyl tsıfrlyq formatqa kóshiriledi. Endi salymshynyń tólem alýǵa kelisimi elektrondy túrde tirkeledi.
Tólemdi qaıta esepteý
Zeınetaqy tólemi ótinish bergen kúnnen nemese elektrondyq ótinimdi tirkeý kúninen bastap taǵaıyndalady jáne zeınet jasyna jetkenge deıin nemese jınaq tolyq taýsylǵanǵa deıin júzege asyrylady. Biryńǵaı jınaqtaýshy zeınetaqy qory jyl saıyn tólem mólsherin ózdiginen qaıta esepteıdi.
Erekshe jaǵdaı
Qazaqstan azamattyǵynan aırylý, shetelge turaqty turýǵa ketý nemese qujattyń jaramsyz dep tanylýy jaǵdaıynda tólem erejede kózdelgen tártippen toqtatylady.
Adam qaıtys bolǵan jaǵdaıdaǵy tólem
Qaıtys bolǵan salymshynyń týystaryna jerleýge birjolǵy tólem kózdelgen. Ol 94 aılyq eseptik kórsetkishten (AEK) aspaıdy, biraq shottaǵy jınaq somasynan kóp emes. Eger osy tólemnen keıingi qaldyq eń tómengi zeınetaqy mólsherinen az bolsa, ol da otbasy múshelerine aýdarylady.
Ortasha aılyq tabysty almastyrý koeffıtsıentin Biryńǵaı jınaqtaýshy zeınetaqy qory bekitilgen ádistemege sáıkes esepteıdi.
Zeınetaqy jarnasyn ustaý tártibin túzetý
Ózgerister mindetti zeınetaqy jarnasy, mindetti kásibı zeınetaqy jarnasy jáne jumys berýshiler jarnasyn ustaý tártibine de engizildi.
Osylaısha, mindetti zeınetaqy jarnasy men mindetti kásibı zeınetaqy jarnasy Salyq kodeksinde kózdelgen keıbir tólem men tabystan ustalmaıdy. Atap aıtqanda, bul bosatý:
— Salyq kodeksiniń 319, 329, 330 jáne 341-babynda kórsetilgen tabysqa (jekelegen tarmaqshalardan basqa);
— múgedektigi bar adamdarǵa tólenetin zattaı nysandaǵy tólem men materıaldyq ıgilikke qoldanylady.
Osyǵan uqsas tártip jumys berýshilerdiń jarnasynda da belgilengen: keıbir tólem men tabys túrin esepteý kezinde eskerilmeıdi.
Qaýly 2025 jylǵy 1 qyrkúıekten bastap kúshine enedi, al jekelegen normalar 2025 jylǵy 1 qańtardan bastap týyndaǵan quqyqtyq qatynastarǵa qoldanylady.
Jyl basynan beri qazaqstandyqtarǵa 2,4 trln teńgege jýyq zeınetaqy tólendi.