1 qyrkúıekten bastap shyny bótelkedegi syraǵa tsıfrlyq tańbalaý engiziledi
ASTANA. KAZINFORM — 2026 jylǵy 1 qyrkúıekten bastap Qazaqstanda shyny bótelkelerdegi syra men syra sýsyndaryn mindetti tsıfrlyq tańbalaý engiziledi. Osy kúnnen keıin óndirilgen nemese ımporttalǵan ónimniń árqaısysynda Data Matrix tańbalaý kody bolýǵa tıis.
Syra ónimderin tsıfrlyq tańbalaý kezeń-kezeńimen engizilip jatyr. 2026 jylǵy 1 aqpannan bastap talap kegterdegi syraǵa qatysty kúshine endi. 1 qyrkúıekten bastap shyny bótelkelerdegi ónim tańbalanady. Al 2027 jylǵy 1 qańtardan bastap metall bankalardaǵy syra men syra sýsyndary da mindetti tsıfrlyq tańbalaýǵa kóshedi.
Jańa júıe ónimniń óndirýshiden nemese ımporttaýshydan bastap bólshek saýdaǵa deıingi qozǵalysyn baqylaýǵa múmkindik beredi. Bolashaqta taýardy aınalymǵa qatysýshylar arasynda berý kezinde qujattardy elektrondy túrde rásimdeý jáne rastaý arqyly ónimniń tolyq qadaǵalanýy qamtamasyz etiledi.
Sala ókilderi jańa talaptarǵa daıyndyq júrgizip jatyr. Qazirgi ýaqytta TT AJO júıesinde aınalymǵa qatysýshylardyń 16 392-den astamy tirkelgen.
Naryq qatysýshylary ne isteýi kerek?
Aınalymǵa qatysýshylar tanba.markirovka.kz portalynda TT AJO júıesine tirkelip, taýar kartochkalaryn tirkeýdi bastaýy qajet.
Tańbalaý kodtaryn alý úshin júıede tirkeýden aldyn ala ótý usynylady.
Al mindetti tańbalaý engizilgenge deıin óndirilgen syra men syra sýsyndarynyń tańbalanbaǵan qaldyqtaryn belgilengen tártipke sáıkes bir kúntizbelik jyl ishinde ótkizýge bolady.
Eske salaıyq, buǵan deıin Densaýlyq saqtaý mınıstriniń 2026 jylǵy 10 shildedegi buıryǵymen bıologııalyq belsendi qospalardy (BBQ) tańbalaýda qoldanylatyn baqylaý (sáıkestendirý) belgisi men sáıkestendirý quralynyń shekti quny belgilengenin jazǵanbyz.
