1 qyrkúıekten bastap shetelde júrgen qazaqstandyqtarǵa pasport rásimdeý tártibi ózgeredi
ASTANA.KAZINFORM — Qazaqstanda shetelde júrgen azamattardyń pasport rásimdeý úshin qaıda jáne qalaı qujat tapsyratynyna qatysty tártip jańartyldy.
Tıisti ózgerister QR Syrtqy ister mınıstriniń 2026 jylǵy 17 tamyzdaǵy buıryǵymen engizildi. Jańa tártip 1 qyrkúıekten bastap kúshine enedi.
Shetelde júrgen Qazaqstan azamattary pasport rásimdeý úshin elimizdiń sol memlekettegi dıplomatııalyq ókildigine nemese konsýldyq mekemesine júgine alady. Atap aıtqanda, bul qyzmetti shetelde turaqty turatyn azamattar, shetelde oqyp júrgen stýdentter men eńbek sharty boıynsha jumys isteıtinder, Qazaqstannan tys jerde týǵan kámeletke tolmaǵandar, sondaı-aq olardyń otbasy músheleri paıdalana alady.
Sonymen qatar mundaı múmkindik shetel azamattarynyń otbasy múshelerine, dıplomatııalyq qyzmet ókilderiniń týystaryna, qart adamdar men múmkindigi shekteýli azamattarǵa, ózine-ózi qyzmet kórsete almaıtyn jaqyndaryna kútim jasaıtyn adamdarǵa beriledi. Sondaı-aq shetelde ustalǵan, qamaýda otyrǵan nemese jazasyn ótep júrgen Qazaqstan azamattary da pasport rásimdeı alady.
Pasport qansha ýaqytta daıyn bolady
Eger Qazaqstannyń sheteldegi mekemesi «Sheteldegi mekemelerge arnalǵan halyqty qujattandyrý jáne tirkeý» tsıfrlyq júıesine qosylǵan bolsa, pasport 40 jumys kúni ishinde rásimdeledi.
Al atalǵan júıege qosylmaǵan jaǵdaıda pasport rásimdeý merzimi 90 kúntizbelik kúnge deıin sozylady.
Qujat tapsyrý úshin kezekte kútý ýaqyty 30 mınýttan, al ótinish berýshige tikeleı qyzmet kórsetý 10 mınýttan aspaýǵa tıis.
Qujattar qabyldanǵannan keıin sheteldegi mekeme olardy eki kúntizbelik kún ishinde daıyndap, dıplomatııalyq poshta arqyly Qazaqstannyń Syrtqy ister mınıstrligine jiberedi. Odan ári qujattar tekserý jáne pasport ázirleý úshin Іshki ister mınıstrligine joldanady.
Іshki ister mınıstrligine qujattardy tekserip, pasport daıyndaý úshin 30 kúntizbelik kúnge deıin ýaqyt beriledi. Daıyn qujat keıin Syrtqy ister mınıstrligine jiberiledi. Mınıstrlik ony 25 kúntizbelik kún ishinde tıisti sheteldegi mekemege joldaıdy.
Pasport sheteldegi mekemege túskennen keıin ótinish berýshige qujattyń daıyn bolǵany bes kúntizbelik kún ishinde habarlanady.
Daıyn pasport azamattyń ózine nemese onyń zańdy ókiline beriledi.
Balalarǵa pasport rásimdeý tártibi
Jańa qaǵıdalarda JSN-y joq 14 jasqa deıingi balalarǵa alǵash ret pasport rásimdeý tártibi de jeke qarastyrylǵan.
Mundaı jaǵdaıda Qazaqstannyń sheteldegi mekemesi balaǵa JSN berý rásimin bastaıdy. Іshki ister mınıstrligi tıisti elektrondyq ótinimdi eki jumys kúni ishinde qaraıdy.
JSN berilgennen keıin bala týraly málimetter tsıfrlyq júıege engizilip, pasport rásimdeýge ótinim joldanady.
Eger júıe arqyly JSN qalyptastyrý múmkin bolmasa, qujattar qaǵaz túrinde rásimdelip, Іshki ister jáne Syrtqy ister mınıstrlikterine jiberiledi.
Jańartylǵan qaǵıdalar 2026 jylǵy 1 qyrkúıekten bastap qoldanysqa engiziledi.
Aıta keteıik, buǵan deıin Qazaqstanda dıplomatııalyq jáne qyzmettik pasport berý tártibi ózgergeni habarlandy.
