1 qyrkúıekten bastap Pavlodardan Almaty men Astanaǵa qaıtadan ushýǵa bolady
PAVLODAR. KAZINFORM - Qazirgi ýaqytta Pavlodar áýejaıyndaǵy ushý-qoný jolaǵyn jóndeý jumystary 98%-ǵa aıaqtalǵan. 25 tamyzǵa qaraı mamandar paıdalanýǵa berý aktin alýdy josparlap otyr.
Ótken aptada Pavlodar áýejaıynyń ushý-qoný jolaǵyna iri túıirshikti asfalt tóseý jumystary aıaqtalyp, endi tek usaq túıirshikti qabaty qalǵan. Bul jumystar júzege asyrylǵan soń, boljam boıynsha 15–17 tamyz aralyǵynda, komıssııa tekserýge kirisedi. Onyń ishine jaryq berý-sıgnaldyq qural-jabdyqtardy ınspektsııalaý da enedi.
Mamandar 25 tamyzǵa deıin paıdalanýǵa berý aktisin alyp, 1 qyrkúıekten bastap reısterdi iske qosýdan úmitti. Aldymen Almaty men Astana baǵyttary ashylady.
- Eń áýeli Almaty men Astana, sondaı-aq Shymkent pen Aqtaý baǵyttaryn iske qosamyz. Budan bólek, ózge óńirlermen, sonyń ishinde kórshiles eldermen de qazir kelissózder júrgizip jatyrmyz. Máselen Reseıdiń Novosibir qalasy. Biraq bul Tashkent - Pavlodar — Novosibir jáne Novosibir - Pavlodar - Tashkent túıispeli (tranzıttik) reısi bolady. Ózbekstan tarapymen kelissózder sońǵy kezeńde, Novosibir tarapy bul ushýdy qoldap otyr, - dep jaýap berdi Kazinform tilshisine Pavlodar oblysynyń ákimi Asaıyn Baıhanov.
Sondaı-aq óńir basshysy Astana baǵytyndaǵy áýe bıletteriniń quny ary qaraı da sýbsıdııalanatynyn atap ótti. Ázirge baǵa burynǵysha 20 myń teńge kóleminde qalady. Biraq ósýi de múmkin.
Eske sala keteıik, 2025 jylǵy 1 sáýirden bastap Pavlodar áýejaıy ushý-qoný jolaǵyn qaıta jańartý úshin jabylǵan bolatyn Pavlodar áýejaıy 1 sáýirden jóndeýge jabylǵan bolatyn.
Keıin qarjy jetkiliksizdigine baılanysty Pavlodar áýejaıyn jóndeý taǵy bir jylǵa uzardy.
Bılik ókilderi Pavlodar áýejaıynyń ótkizý qabileti 300 jolaýshyǵa deıin artatynyn málimdegen bolatyn.
