1 qyrkúıekten bastap bıologııalyq belsendi qospalardy mindetti tsıfrlyq tańbalaý engiziledi
ASTANA. KAZINFORM — 2026 jylǵy 1 qyrkúıekten bastap elimizde bıologııalyq belsendi qospalardy (BBQ) mindetti tsıfrlyq tańbalaý talaby kúshine enedi. Kórsetilgen kúnnen keıin óndirilgen nemese Qazaqstan aýmaǵyna ákelingen barlyq ónim Data Matrix kodymen tańbalanýy tıis.
Densaýlyq saqtaý mınıstrligi málimetinshe, BBQ-nyń mindetti qadaǵalaný júıesin iske qosý 2027 jylǵy 1 naýryzǵa josparlanǵan. Osy kúnnen bastap ónim aınalymy tolyq elektrondyq qujat aınalymymen súıemeldenip, taýar naryqqa qatysýshylardyń arasynda berilgen kezde árbir operatsııa rastalýy tıis.
Tsıfrlyq tańbalaý sheńberinde ónimniń árbir birligine biregeı Data Matrix kody beriledi. Kod qaptamaǵa túsirilip, Taýarlardy tańbalaý jáne qadaǵalaýdyń biryńǵaı operatorynyń júıesinde tirkeledi. Bul ónimniń óndirýshiden nemese ımporttaýshydan bastap dúken sóresine deıingi barlyq kezeńderdegi qozǵalysyn qadaǵalaýǵa múmkindik beredi.
Memleket bul shara BBQ-nyń naryqtaǵy aınalymynyń ashyqtyǵy men zańdylyǵyn qamtamasyz etýge, adal bıznesti josyqsyz básekeden qorǵaýǵa jáne zań buzýshylyqtardy ýaqtyly anyqtaýǵa múmkindik beredi dep kútedi. Tańbalaýmen naryqtyń jetkilikti bóligi qamtylǵannan keıin satyp alýshylar qaptamadaǵy Data Matrix kodyn Naqty Onim qosymshasy arqyly skanerlep, satyp alatyn BBQ-nyń zańdylyǵyn óz betinshe teksere alady.
Naryqqa qatysýshylar ne isteýi qajet?
BBQ aınalymy salasynda jumys isteıtin kompanııalarǵa:
1. Taýarlardy tańbalaý jáne qadaǵalaýdyń tsıfrlyq júıesinde (TTQTsJ) tanba.markirovka.kz portalynda tirkelý.
2. Taýar kartochkalaryn júıede aldyn ala tirkeýdi bastaý.
Nazar aýdaramyz: tirkelgen taýar kartochkalary jańartýdan ótedi, oǵan belgili bir ýaqyt qajet. Osyǵan baılanysty naryqqa qatysýshylarǵa tirkeýdi keıinge qaldyrmaý usynylady. Bul talap kúshine engenge deıin jańartý rásimin aıaqtap, tańbalaý kodtaryna ýaqtyly tapsyrys berýge múmkindik beredi.
Mindetti tańbalaý engizilgen kúnge deıin óndirilgen, tańbalanbaǵan BBQ qaldyqtaryn aınalymǵa qatysýshylar belgilengen tizbege sáıkes olardyń jaramdylyq merzimi aıaqtalǵanǵa deıin ótkize alady.
Aıta keteıik, shilde aıynda elimizdegi dárihanalarda baqylanatyn dárilik zattardyń tórtten birine jýyǵynyń baǵasy arzandady.
