1 qyrkúıekten bastap alǵashqy áskerı daıyndyq páni jańartylǵan baǵdarlamamen ótedi
ASTANA.KAZINFORM - Jańa oqý jylynan bastap elimizdiń mektepterinde alǵashqy áskerı daıyndyq (AÁD) páni jańartylǵan baǵdarlama boıynsha oqytylady. Bul týraly Qorǵanys mınıstrligi habarlady.
Astanada ótken respýblıkalyq sektsııada pánniń jańa mazmuny, oqytýdyń zamanaýı ádisteri men pedagogterdiń kásibı daıarlyǵyna qoıylatyn talaptar tanystyryldy.
Qazaq ulttyq sport ýnıversıtetinde «Alǵashqy áskerı daıyndyqtyń zamanaýı modeli: mazmuny, tehnologııalary jáne pedagogtiń kásibı damýy» taqyrybynda is-shara uıymdastyryldy. Oǵan Qorǵanys jáne Oqý-aǵartý mınıstrlikteriniń ókilderi, sondaı-aq elimizdiń barlyq óńirinen kelgen ádiskerler men AÁD pániniń oqytýshylary qatysty.
Sektsııa barysynda qatysýshylarǵa pán mazmunyna engizilgen negizgi ózgerister, zańnamadaǵy jańalyqtar jáne pedagogterdi daıarlaý júıesindegi jańa talaptar tanystyryldy. Mundaı jańashyldyqtar áskerı-patrıottyq tárbıeni jetildirýge baǵyttalǵan. Olar 2025 jylǵy shildede Memleket basshysy qol qoıǵan «Áskerı qyzmet jáne áskerı qyzmetshilerdiń mártebesi týraly» Qazaqstan Respýblıkasynyń Zańyna engizilgen ózgeristerge negizdelgen.
– 1 qyrkúıekten bastap pán «Alǵashqy áskerı daıyndyq» ataýyn qaıta ıelenip, oqytý formaty túbegeıli ózgeredi. Bul ózgerister pánniń mazmunyna jáne pedagogterdi daıarlaý tásilderine de qatysty. Endi oqytýshylardyń biliktiligin arttyrý áskerı oqý oryndarynda uıymdastyrylady. Bul olardyń praktıkalyq daıarlyǵyn kúsheıtýge múmkindik beredi. Budan bólek zańnamada pedagogterdiń áskerı ótili bolýy da qarastyrylǵan, – dedi Áskerı bilim jáne ǵylym departamenti bastyǵynyń orynbasary maıor Lıýdmıla Perıakına.
Іs-shara barysynda ádiskerler, PhD doktorlary men professorlar alǵashqy áskerı daıyndyqty uıymdastyrýdyń jáne áskerı-patrıottyq tárbıeniń zamanaýı tásilderin bólisti. Jastardy áskerı qyzmetke daıarlaý, pedagogterdiń jańa kásibı quzyretterin qalyptastyrý jáne olardyń biliktiligin úzdiksiz arttyrý máselelerine erekshe nazar aýdaryldy.
Oqý úderisin tsıfrlandyrý basty baǵyttardyń biri boldy. Pedagogterge oqý materıaldaryn, baǵalaý quraldary men sıtýatsııalyq tapsyrmalardy ázirleý kezinde jasandy ıntellekt múmkindikterin paıdalaný joldary kórsetildi. «Zamanaýı AÁD sabaǵy: oqý mindetinen tsıfrlyq stsenarııge deıin» atty praktıkalyq demonstratsııa barysynda qatysýshylar taktıkalyq sımýlıatorlar men tsıfrlyq bilim berý sheshimderin qoldaný múmkindikterimen tanysty.
Budan bólek, AÁD sabaqtarynda ushqyshsyz basqarylatyn qurylǵylar tehnologııalaryn oqytý ádisteri, qosymsha bilim berý júıesindegi jastardyń áskerı qyzmetke deıingi daıarlyǵyn uıymdastyrýdyń zamanaýı tásilderi, áskerı-sporttyq jáne áskerı-qoldanbaly jarystardy bilim berý úderisinde tıimdi paıdalaný joldary da aıtyldy.
Sektsııa sońynda AÁD pániniń úzdik oqytýshylary marapattaldy. Áskerı bilim jáne ǵylym departamentiniń bastyǵy polkovnık Murat Oljabaev pedagogterge Qorǵanys mınıstriniń atynan gramotalar tabys etti.
Aıta keteıik, Ulttyq ulanda barlyq áskerı qyzmetshiniń jalaqysy bir ýaqytta tólenetin boldy.
