1 qyrkúıekte kólikti úıde qaldyrýǵa shaqyramyz - Almaty ákimdigi men polıtsııa
ALMATY. KAZINFORM — Jańa oqý jyly qarsańynda kóshelerde keptelistiń kúsheıýine baılanysty almatylyqtarǵa úndeý jasaldy.
Jol qozǵalysyn uıymdastyrý jáne jolaýshylar kóligi basqarmasy basshysynyń orynbasary Azamat Eshanquldyń aıtýynsha, kún saıyn qalalyq baǵyttarǵa 3 232 avtobýs pen trolleıbýs shyǵyp, 1,6 mıllıonǵa jýyq jolaýshyny tasymaldaıdy. Degenmen, 1 qyrkúıekten bastap rezervtegi kólikterdiń esebinen keıbir baǵyttarda qoǵamdyq kólik sanyn kóbeıtý josparlanyp otyr. Eń aldymen, qosymsha avtobýstar mektepterdiń janynan ótetin marshrýttarǵa qosylady.
Sondaı-aq ol 1 qyrkúıekte joldarǵa qosymsha salmaq túsirmeý úshin turǵyndardy múmkindiginshe qoǵamdyq kólikti paıdalanýǵa shaqyrdy. Bul usynysty Almaty qalasynyń polıtsııa departamenti de qoldady. Tártip saqshylary júrgizýshilerden jol júrý baǵytyn aldyn ala josparlaýdy jáne tańǵy ýaqytta jeke kólikten bas tartýdy suraıdy.
Quqyq qorǵaý organdarynyń baǵalaýynsha, bul kúni turǵyndardyń bir bóligi jeke kólikti paıdalanýdan bas tartsa, bul qala kóshelerindegi kólik aǵynyn aıtarlyqtaı azaıtýǵa múmkindik beredi. Eger kem degende árbir besinshi otbasy kóligin úıde qaldyrsa, myńdaǵan kólik joldarǵa júkteme túsirmeıdi.
Eske salaıyq, Almatyda qyrkúıektiń alǵashqy kúnderi mektep mańyndaǵy qaýipsizdik kúsheıtiledi.
