1 qyrkúıekke qaraǵan túni saǵatyna 6 meteorǵa deıin kórýge bolady
ASTANA. KAZINFORM – 1 qyrkúıekke qaraǵan túni sharyqtaý shegine jetetin Aýrıgıdter meteor aǵynyn Aıdyń jaryǵyna baılanysty baqylaý qıyndaıdy, dep habarlaıdy TASS.
Máskeý planetarııi ádistemelik súıemeldeý bóliminiń jetekshisi, astronom Lıýdmıla Koshmannyń aıtýynsha, Aýrıgıdter nemese Alfa-Aýrıgıdter ortasha qarqyndy meteor aǵyndarynyń qataryna jatady.
Olardyń radıanty, ıaǵnı meteorlar ushyp shyǵatyndaı bolyp kórinetin aspan aımaǵy Arbakesh shoqjuldyzynda, Kapella juldyzyna jaqyn ornalasqan. Bul meteor aǵynynyń paıda bolýyna C/1911 N1 Kiess kometasy sebep bolǵan.
– 2026 jyly Aýrıgıdter 28 tamyz ben 5 qyrkúıek aralyǵynda belsendi bolady jáne 31 tamyzdan 1 qyrkúıekke qaraǵan túni sharyqtaý shegine jetedi. Boljam boıynsha, aspan minsiz qarańǵy bolǵan jaǵdaıda saǵatyna alty meteorǵa deıin kórýge bolar edi. Alaıda meteor aǵynynyń sharyqtaý kezeńindegi jaryq Aı kózge kórinetin «aqqan juldyzdardyń» sanyn aıtarlyqtaı azaıtady, – dedi Lıýdmıla Koshman.
Kúzdiń alǵashqy meteor aǵyny meteorlar sanynyń azdyǵymen erekshelenedi. Degenmen keı jyldary onyń belsendiligi kenetten kúsheıgen.
1935 jyly osyndaı kútpegen belsendiliktiń arqasynda ǵalymdar bul meteor aǵynyn anyqtaǵan. Qysqa merzimdi belsendilik 1986, 1994 jáne 2019 jyldary da baıqalyp, keı kezderi saǵatyna 30-50 meteorǵa deıin jetken.
Mamandardyń boljamynsha, aldaǵy 70 jylda qyrkúıektiń basynda Aýrıgıdterdiń asa qarqyndy «juldyz jaýyny» kútilmeıdi. Óıtkeni Jer orbıtasy Kiess kometasy qaldyrǵan shańdy izben jaqyn arada qıylyspaıdy. Kometanyń usaq bólshekteri Jer atmosferasyna engen kezde meteorlar paıda bolady.
Aıta keteıik, buǵan deıin Perseıdter meteor aǵyny 13 tamyzǵa qaraǵan túni sharyqtaý shegine jetetini málim boldy.
