1 qazannan Qazaqstan boıynsha qyzylshaǵa qarsy vaktsına egý bastalady
ASTANA.QazAqparat - Osy jyldyń 1 qazanynan bastap Qazaqstannyń barlyq óńirinde qyzylshaǵa qarsy vaktsınalaý maýsymy bastalady. QR UEM Tutynýshylardyń quqyqtaryn qorǵaý komıteti tóraǵasynyń orynbasary Jandarbek Bekshınniń aıtýynsha, qyzylsha juqtyrýshylardyń sany kóp tirkelgen soń, qosymsha vaktsınalaý maýsymy qaıta bastalmaq.
«Dúnıejúzilik densaýlyq saqtaý uıymynyń deregi boıynsha, qazir álemde qyzylsha aýrýyna qatysty jaǵdaı kúrdelenip otyr. Qazaqstan Respýblıkasynda jyl basynan beri qyzylsha juqtyrǵan 2283 adam tirkeldi. Ókinishke oraı, aldyńǵy ımmýndaý maýsymynda vaktsına almaǵan bir jasóspirim maýsym aıynda qyzylsha aýrýynan kóz jumdy. Qyzylsha aýrýynyń asqynatyn birneshe túri bolady, sonyń biri jáne óte qaýiptisi mıdyń qabynýy. Sondyqtan, ata-analar men el azamattaryn vaktsınadan bas tartpaýǵa shaqyramyn. Bıyl qosymsha ımmýndaý jumystaryn jalǵastyrý týraly qaýly bekitildi. Osy qaýlyǵa sáıkes, el boıynsha barlyq nasıhattaý jumystaryn aıaqtadyq. Immýndaý maýsymyna qatysatyn medıtsına mamandary daıarlandy», - dedi J.Bekshın.
Elimizdiń bas sanıtarlyq dárigeri málim etkendeı, ımmýndaý maýsymy aıasynda 15-19 jastaǵy jasóspirimder men qyz-jigitter qyzylshaǵa qarsy egiledi.
«Qosymsha vaktsınalaýdy qazan aıynda bastaıyn dep otyrǵan sebebimiz, jaz aıynda balalar kanıkýlda bolady. 1 qyrkúıekten bastap josparly túrde týberkýlezge qarsy vaktsınalaý bastalady. Epıdemıologııalyq talaptarǵa sáıkes, bir ýaqytta eki vaktsınany qatar júrgizýge bolmaıdy», - dep túsindirdi J.Bekshın.
