1 qazannan bastap juqpaly respıratorlyq vırýsty ınfektsııanyń 40 myń jaǵdaıy tirkeldi - Densaýlyq saqtaý mınıstrligi
ASTANA. 18 qazan. QazAqparat - Dúnıejúzilik densaýlyq saqtaý uıymynyń boljamyna sáıkes, aǵymdaǵy epıdemıologııalyq maýsymda A(H3N2) jáne (A(H1N1) maýsymdyq tumaýy aınalymda bolady dep boljanady.
A tumaýymen qatar V tumaýynyń vırýsy, sondaı-aq tumaýǵa uqsas respıratorlyq vırýstardyń da belsendiligi artady. Bul týraly Densaýlyq saqtaý mınıstrliginiń baspasóz qyzmeti habarlaıdy.
Aǵymdaǵy jyldyń 1-shi qazanynan bastap juqpaly respıratorlyq vırýsty ınfektsııanyń 40 myń jaǵdaıy, onyń ishinde sońǵy aptada 22 myń jaǵdaıy tirkeldi. Qostanaı, Batys Qazaqstan, Pavlodar, Shyǵys Qazaqstan oblystarynda jáne Almaty men Astana qalalarynda syrqattanýshylyq respýblıkalyq kórsetkishten joǵary deńgeıde tirkeldi. Elimizdiń barlyq óńirlerinde tumaýdy jáne onyń asqynýlaryn emdeýge arnalǵan vırýsqa qarsy preparattardyń qory quryldy. Tegin medıtsınalyq kómektiń kepildik berilgen kólemi sheńberinde 2011-2012 jyldyń epıdemııalyq maýsymyna 577 mln. teńgeden astam somaǵa Frantsııada shyǵarylǵan (Vaksıgrıpp), sapasyna kepildik berilgen vaktsınanyń 784 myń dozasy satyp alyndy.
