1 qazannan bastap protsessýaldyq sheshimder elektrondy formatta shyǵarylady - prokýratýra

NUR-SULTAN. QazAqparat - 2020 jyldyń 1 qazanynan bastap azamattarymyzdyń konstıtýtsııalyq quqyǵyna qatysty ister boıynsha basty protsesýaldyq sheshimder shyǵarý elektrondy formatqa kóshiriledi.

Bul týraly QR Bas prokýrorynyń orynbasary Marat Ahmetjanov aıtty, dep habarlaıdy QazAqparat tilshisi.

«1 qazannan bastap sotqa deıingi tergeýmen aınalysatyn barlyq quqyq qorǵaý organdary azamattarymyzdyń konstıtýtsııalyq quqyǵyn qozǵaıtyn ister boıynsha basty protsessýaldyq sheshim shyǵarýdy elektrondy formatqa kóshiredi. Keshe elimizdiń bas prokýrory Pavlodar oblysyna jumys saparymen baryp, jańashyldyq is júzinde qalaı áreket etetindigimen, onyń múmkindigimen tanysty», - dedi ol Ortalyq kommýnıkatsııalar qyzmetindegi baspasóz máslıhatynda.

Onyń aıtýynsha, 1 qazannan bastap kez kelgen protsessýaldyq sheshim shyǵarylǵannan keıin birden sotqa deıingi tergeýdiń biryńǵaı tizimine engiziletin bolady. Al ol qadaǵalaýshy prokýror men protsessýaldyq protsestiń ózge de qatysýshylaryna kórinip turady. Óz kezeginde prokýror sheshimniń zańdylyǵyn der ýaqytynda qadaǵalaı alady. Zań buzýshylyq oryn alǵan jaǵdaıda ol elektrondy formatty joıady.

«Prezıdent atap ótkendeı, qadaǵalaýdyń kesheýildeý jaǵdaıy bar. Qaǵaz nusqada ony burmalaýǵa, ózgertýge bolady. Al muny boldyrmaý tásiliniń biri – tsıfrlandyrý. Bul prokýrorlarǵa qosymsha ókilettik emes, qylmystyq isterde azamattardyń quqyǵy úshin qosymsha jaýapkershilik júkteıdi. Sondyqtan da biz munyń qalaı jumys isteıtindigin Pavlodar oblysynda baıqap kórdik, beıimdedik jáne 1 qazannan bastap búkil elimizge bul júıeni engizýge bolady degen paıymǵa keldik», - dedi Marat Ahmetjanov.