1 qazannan bastap depozıtterge qatysty qandaı ózgeris bolady
ASTANA. KAZINFORM — 1 qazannan bastap valıýtalyq depozıtter boıynsha mólsherleme ózgeredi, dep habarlaıdy «Qazaqstannyń depozıtterge kepildik berý qory» AQ baspasóz qyzmeti.
Qor jeke tulǵalardyń depozıtteri boıynsha mólsherlemelerdi retteýdi yryqtandyrý aıasynda 2026 jyldyń 1 qazanynan bastap, keıbir valıýtalyq depozıtter boıynsha shekti mólsherlemelerdiń kóteriletindigi týraly habarlaıdy.
— Qazirgi kezeńde merzimi 12 aıdan joǵary jınaq salymdardyń mólsherlemeleri ǵana ózgeredi, ıaǵnı 1 qazannan bastap, mundaı salymdar boıynsha shekti mólsherleme jyldyq 1,0%-dan 2,5%-ǵa deıin joǵarylaıdy. Jańa shekti syıaqy mólsherlemeleri 2026 jyldyń 1 qazanynan keıin ashylatyn nemese merzimi uzartylatyn salymdarǵa ǵana qoldanylýy múmkin. Atap ótý kerek, shekti mólsherlemeler — shetel valıýtasyndaǵy depozıtter boıynsha syıaqy mólsherlemelerin anyqtaý úshin usynylatyn joǵarǵy shekara sanalady. Bul rette bankter ózderiniń depozıttik ónimderi boıynsha syıaqy mólsherlemeleriniń deńgeıi týraly sheshimdi óz betimen qabyldaıdy. Bul kezeńde ár túrli merzimge ashylatyn merzimdi, merzimsiz, sondaı-aq merzimi 12 aı jáne odan tómen bolatyn jınaq salymdar boıynsha shekti mólsherlemeler 1% deńgeıinde ózgerissiz qalady, — deıdi vedomstvo mamandary.
QDKBQ málim etkendeı, bul sheshimge QR Ulttyq bankiniń depozıt naryǵyn dollarsyzdandyrý saıasatyn sátti júrgizgendiginiń arqasynda qol jetkizildi.
— Dollarlaný deńgeıi 2015 jyldaǵy 80%-dan 2026 jyldyń 1 qyrkúıegine qaraı 19,2%-ǵa deıin tómendedi. Sonymen birge tıimdi makroekonomıkalyq jaǵdaıat jáne jyl barysynda teńgeniń nyǵaıý úrdisi Ulttyq bankke qormen birlesip, valıýta naryǵyndaǵy reformalardy odan ári jalǵastyryp, valıýtalyq depozıtter boıynsha mólsherlemelerdi retteýge qatysty qoldanystaǵy tásilderdi kezeń-kezeńmen yryqtandyrýǵa kirisýge múmkindik berdi. Jeke tulǵalardyń shetel valıýtasyndaǵy depozıtteri boıynsha QDKBQ maksımaldy kepildigi ózgerissiz qalady, — delingen habarlamada.
Eske salamyz, QDKBQ qazaqstandyq salymshylardyń árbir banktegi jınaq aqshasyn zańnamalyq turǵyda qorǵalýyn qamtamasyz etedi:
- 20 mıllıon teńgege deıin — syıaqysyn qosqanda teńgedegi jınaq salymdar boıynsha (merziminen buryn alýǵa bolmaıtyn depozıtter);
- 10 mıllıon teńgege deıin — syıaqysyn qosqanda, teńgedegi basqa salymdar, sondaı-aq teńgedegi aǵymdyq shottar men tólem kartalary boıynsha;
- 5 mıllıon teńgege deıin — syıaqysyn qosqanda, dollar, eýro nemese basqa da shetel valıýtasyndaǵy kez kelgen salymdar, shottar jáne kartalar boıynsha.
Aıta keteıik, Qazaqstannyń depozıtterge kepildik berý qory bankter arasynda básekelestikti yntalandyrý, bank sektorynda júıelik táýekelderdiń jınalýyn eskertý jáne qarjylyq turaqtylyqty qamtamasyz etý maqsatynda jeke tulǵalardyń depozıtteri boıynsha syıaqy mólsherlemelerin retteýdi júzege asyrady. Qazirgi sátte depozıtterge kepildik berý júıesine 20 bank qatysady.
Osyǵan deıin sarapshy teńgeni qaıda salý keregin aıtty.
