1 qazannan bastap Almaty – Tashkent baǵytynda «Áıelder vagony» iske qosylady
ASTANA. KAZINFORM — Ulttyq tasymaldaýshy Almaty – Tashkent halyqaralyq baǵytynda «Áıelder vagonyn» iske qosady.
«Jolaýshylar tasymaly» AQ bıyl 1 qazannan bastap alǵash ret №1/2 «Almaty – Tashkent» halyqaralyq poıyzynyń quramynda «Áıelder vagony» qyzmetin iske qosady. Atalǵan poıyz Qazaqstan men Ózbekstan arasyndaǵy turaqty temirjol qatynasyn qamtamasyz etip, eki eldiń iri qalalaryn baılanystyrady.
«Almaty – Tashkent halyqaralyq baǵyty Qazaqstan men Ózbekstan arasyndaǵy jolaýshylar qatynasyn damytýda mańyzdy ról atqarady. Baǵytqa suranystyń artýy jáne jolaýshylar aǵynynyń ósýi eskerile otyryp, osy baǵytta «Áıelder vagonyn» iske qosý týraly sheshim qabyldandy. Bul qyzmet ishki temirjol baǵyttarynda da jolaýshylar arasynda joǵary suranysqa ıe.
— «Áıelder vagony» qyzmeti iske qosylǵannan beri ony 946 myńnan astam jolaýshy paıdalandy, - dep atap ótti «Jolaýshylar tasymaly» AQ Basqarma tóraǵasy Ánýar Ahmetjanov.
Qazirgi ýaqytta poıyz kún saıyn qatynaıdy:
* Almaty stantsııasynan jónelýi — 19:05;
* Tashkent stantsııasyna kelýi — 12:53 (Tashkent ýaqytymen);
* Tashkent stantsııasynan jónelýi — 14:41 (Tashkent ýaqytymen);
* Almaty stantsııasyna kelýi — 08:51.
Jańa vagonnyń iske qosylýyna baılanysty «Áıelder vagony» qyzmeti qoljetimdi baǵyttardyń sany 14-ke jetedi:
* №77/78 «Almaty – Mańǵystaý»;
* №351/352 «Almaty – Mańǵystaý»;
* №45/46 «Pavlodar – Túrkistan»;
* №37/38 «Mańǵystaý – Semeı»;
* №47/48 «Atyraý – Astana»;
* №33/34 «Aqtóbe – Almaty»;
* №3/4 «Astana – Almaty»;
* №71/72 «Astana – Shymkent»;
* №353/354 «Astana – Semeı»;
* №23/24 «Aqtóbe – Almaty»;
* №25/26 «Almaty – Shymkent»;
* №613/614 «Oral – Mańǵystaý»;
* №81/82 «Nurly jol – Oral»;
* №1/2 «Almaty-2 – Tashkent».
«Áıelder vagonynda» eresek adamnyń erip júrýimen jeti jasqa deıingi ul balalardy qosa alyp júrýge ruqsat etiledi. Bul vagondarǵa bıletter tek áıelderge satylady, al jolaýshylarǵa tek jolserik áıelder qyzmet kórsetedi.
Bıletterdi temirjol kassalarynan kassırge «Áıelder vagonyn» tańdaǵanyn habarlaý arqyly, sondaı-aq, bilet.railways.kz resmı saıtynda onlaın satyp alýǵa bolady.
Bılet rásimdeý kezinde orynnyń áıelder vagonyna tıesili ekenin bildiretin «JN» belgisine nazar aýdarý qajet.
Bıletter poıyz jóneltiletin kúnge deıin 45 táýlik buryn satylymǵa shyǵarylady. Bul jolaýshylarǵa saparyn aldyn ala josparlaýǵa múmkindik beredi.
Aıta keteıik, Pavlodar men Novosibir arasyndaǵy áýe reısteri qaıta jandanady.
