1 qazanǵa deıin kásipkerlerge qatysty bankrottyq protsedýrasyn qozǵaýǵa tyıym salyndy
NUR-SULTAN. QazAqparat - 2020 jyldyń 1 qazanyna deıin zańdy tulǵalar men jeke kásipkerlerge qatysty bankrottyq protsedýrany qozǵaýǵa tyıym salynady.
Bul týraly Tótenshe jaǵdaı rejımin qamtamasyz etý jónindegi memlekettik komıssııanyń qorytyndy otyrysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.
«Ókinishke qaraı, búkil álemdegideı biz de barlyq kásiporyndar men barlyq jumys oryndaryn saqtap qalyp, árbir bıznestiń turaqtylyǵyn qamtamasyz ete almaımyz. Sondyqtan tótenshe jaǵdaı rejıminiń engizilýinen barynsha zardap shekken ekonomıka sektorlary úshin normatıvtik deńgeıde tótenshe jaǵdaı rejıminiń engizilýi fors-majorlyq jaǵdaı dep moıyndaý mańyzdy. Bul rette jeke kásipkerlik jáne shaǵyn bıznes ókilderi sotqa júgingen kezde tótenshe jaǵdaı fors-majorlyq jaǵdaı dep moıyndalýy tıis», - dedi QR Prezıdenti.
Sonymen qatar Memleket basshysy osynaý qıyn-qystaý kezeńde jumys istep turǵan kásipkerlerdiń ekonomıkalyq belsendiligin qoldaý, jekemenshik pen básekelestikti qoldaý mańyzdy ekendigine nazar aýdartty.
«Josyqsyz kredıtorlar tarapynan qysymǵa jol bermeý maqsatynda osy jyldyń 1 qazanyna deıin zańdy tulǵalar men jeke kásipkerlerge qatysty bankrottyq protsedýrasyn qozǵaýdy toqtatýdy tapsyramyn», - dedi Qasym-Jomart Toqaev.
