1 qazanda «Astana Opera» teatrynyń kameralyq zaly ashylady
ASTANA. 25 qyrkúıek. QazAqparat - 2013 jyly 1 qazanda Halyqaralyq mýzyka kúninde «Astana Opera» teatrynyń kameralyq zalynyń saltanatty ashylýy bolady. Bul týraly elordanyń resmı saıtynan habarlandy.
«Basty qonaq - mýzykany erekshe sezetin ásem metstso-soprano ıesi, depýtat, QR Parlamenti Májilisiniń áleýmettik-mádenı damý komıtetiniń tóraıymy, ánshi Darıǵa Nazarbaeva. Ol pıanıst, QR Eńbegi sińgen qaıratker Tımýr Ormansheevtiń súıemeldeýimen án salady», - delingen «Astana Opera» memlekettik opera jáne balet teatry baspasóz qyzmetiniń habarlamasynda.
Kameralyq zaldyń ashylýyna oraılastyrylǵan gala-kontsertte, sondaı-aq álemge áıgili skrıpkashy, QR Halyq ártisi Aıman Musaqojaeva óz ónerin pash etedi. Kontsertke «Astana Opera» teatrynyń jeke oryndaýshylary, QR Eńbegi sińgen ártister Talǵat Musabaev (barıton), Jan Tapın (tenor) jáne «Solıstter akademııasy» memlekettik kameralyq orkestri qatysady. Ujymnyń kórkemdik jetekshisi - Aıman Musaqojaeva, bas dırıjeri - QR Eńbegi sińgen qaıratker Baqytjan Musaqojaeva. Sonymen qatar, kontsertke Lvovtyń memlekettik fılarmonııasynyń bas dırıjeri Aıdar Torybaev qatysady.
Baǵdarlamada - Barokko dáýiriniń mýzykasy. Sol zamannyń danyshpandary G.F.Gendel, I.S.Bah, T.A.Vıtalı, A.Vıvaldıdiń shyǵarmalary oryndalady.
«Astana Opera» teatrynyń kameralyq zalynyń saltanatty ashylýyna shaqyrý bıleti boıynsha kirýge bolady.
Teatrdyń baspasóz qyzmetiniń habarlaýynsha, kameralyq zaldyń saltanatty ashylýynan keıin 9 qazanda joǵary ónerdi súıer qaýym úshin «Astana Operanyń jas daýystary» atty klassıkalyq mýzykadan keremet kontsert ótedi. Bıletti «Astana Opera» teatrynyń kassasynan alýǵa bolady.
