1 qazan. Týǵan kún ıeleri
ESІMDER
140 jyl buryn (1878-1956) pedagog, jazýshy, aýdarmashy KÓBEEV Spandııar dúnıege keldi.
Qostanaı oblysynda týǵan. Y.Altynsarın ashqan aýyldyq orys-qazaq mektebinde saýat ashyp, 1901 jyly Qostanaıdaǵy muǵalimder daıarlaıtyn kýrsty bitirgen. Uzaq jyldar boıy ustazdyqpen aınalysyp, jas urpaqty oqytý, tárbıeleý isimen shuǵyldanǵan. Qazaq balalaryna orys tili men ádebıetinen sabaq bergen. Óziniń 50 jyldyq ustazdyq is-tájirıbesin «Oryndalǵan arman» atty memýarlyq ádebı eńbeginde baıandady. Ol ustazdyq jumysty jazýshylyq qyzmetpen tyǵyz baılanystyra júrgizdi. Orys jazýshylarynyń tálimdik shyǵarmalaryn qazaq tiline aýdaryp, «Úlgili tárjime» (kópshiligi I.Krylovtyń mysal óleńderi) degen atpen jeke kitap etip bastyryp shyǵardy. 1912 jyly «Úlgili bala» atty ekinshi oqý quralyn (hrestomatııa) jarııalady. Oǵan ózi aýdarǵan Krylovtyń mysaldarymen birge qazaq aýyz ádebıeti úlgileriniń ozyq nusqalaryn (ańyz, áńgime, ertegi, maqal-mátelder) engizdi. Sonymen birge, bul hrestomatııaǵa qazaq balalaryna tabıǵattyń túrli qubylystary men janýarlar álemi týraly málimet beretin qyzyqty qysqa áńgimeler de engizildi. 1913 jyly «Qalyń mal» romanyn jazdy. Romanda sol kezeńdegi qazaq aýylyndaǵy áleýmettik jaǵdaılar shynaıy baıandalǵan. Onyń pedagogıkalyq oı-pikirleri «Oryndalǵan arman» atty memýarlyq romanynda, sondaı-aq, ár jyldardaǵy merzimdi basylymdarda jarııalanǵan «Oqytýshynyń bedeldi bolýynyń mańyzy», «Balalardy mádenıettilikke tárbıeleý», «Balalardy oqýǵa yntalandyrý týraly» atty maqalalarynda ǵylymı turǵyda baıandaldy.
2 ret «Lenın» ordenimen marapattalǵan.
109 jyl buryn (1909-1988) qoǵam qaıratkeri, ǵalym, ekonomıka ǵylymynyń doktory, professor, Qazaqstan Ǵylym akademııasynyń akademıgi, Qazaqstannyń eńbek sińirgen ǵylym kaıratkeri BÁIІShEV Saqtaǵan Báıishuly dúnıege keldi.
Aqtóbe oblysy Baıǵanın aýdanynyń Aqjar aýylynda týǵan.
1927 jyly Temir orys-qazaq jetijyldyq mektebin bitirip, Qarsaqpaıda jas pıonerler aýdandyq bıýrosynyń tóraǵasy bolǵan. 1930 jyly Túrkistan qalasynda BLKJO aýdandyq komıtetiniń hatshysy bolyp istegen. Osy jumystarda júrgende-aq S.Báıishev ekonomıkalyq zertteýlermen shuǵyldana bastaǵan. Jýrnalıstıkaǵa degen qushtarlyq S.Báıishevti respýblıkalyq jastar gazeti - «Lenınshil jasqa» alyp keledi. Muńda ol alǵashqyda bólim meńgerýshisi, sosyn redaktordyń orynbasary qyzmetterin atqarǵan. S.Báıishev 1937-1941 jyldary Almaty joǵary oqý oryndarynda sabaq bergen. 1937-1938 jyldary - Qazaq Marksızm-lenınızm ǵylymı-zertteý ınstıtýtynyń dırektory. 1938-1941 jyldary - «Sotsıalıstik Qazaqstan» («Egemen Qazaqstan») gazetiniń jaýapty redaktory. 1941-1945 jyldary - Keńes Armııasy qatarynda áskerı quramanyń komıssary, saıası bólim bastyǵy, Keńes Armııasynyń saıası basqarmasy apparatynyń jaýapty qyzmetkeri. 1946-1956 jyldary - KOKP Ortalyq komıteti janyndaǵy Marksızm-lenınızm ınstıtýty Qazaq fılıalynyń, Qazaqstan Kompartııasy Ortalyq komıtetiniń janyndaǵy Partııa tarıhy ınstıtýtynyń dırektory, 1956-1968 jyldary - Qazaq KSR Ǵylym akademııasynyń vıtse-prezıdenti qyzmetimen qatar Ekonomıka ınstıtýtynyń dırektory. 1968-1982 jyldary Ekonomıka ınstıtýtynyń bólim meńgerýshisi qyzmetterin atqarǵan. Osy jyldary ol elimizde ǵylymı kadrlar daıarlaý, jańa ǵylym salalaryn qalyptastyrý isine eleýli úles qosty. Ol alpysqa jýyq ǵylym kandıdattary men doktorlarynyń ǵylymı jetekshisi boldy. S.Báıishev Karl Marks «Kapıtalynyń» І-tomynyń taraýlaryn, V.Lenınniń «Reseıde kapıtalızmniń damýy», «Imperıalızm - kapıtalızmniń joǵary satysy» atty kúrdeli eńbekterin tuńǵysh ret qazaq tiline aýdarǵan. Ǵalym 1959 jyly Respýblıka Joǵarǵy Keńesiniń Tóraǵasy bolyp saılandy. Ǵylymı jáne qoǵamdyq qyzmeti kezinde 300-den asa ǵylymı maqala, 7 monografııa jarııalady. Ómiriniń sońǵy jyldaryn akademık Saqtaǵan Báıishev oqytýshylyq jumysqa arnap, ǵylymı kadrlar men ekonomısterdiń jańa urpaǵyn daıarlaý salasynda ulanǵaıyr is tyndyrdy.
Sh.Ýálıhanov atyndaǵy syılyqtyń ıegeri. KSRO ordenderimen, medaldarmen marapattalǵan.
Aqtóbe qalasyndaǵy ýnıversıtetke, oblystyq ǵylymı-ámbebap kitaphanaǵa, Almaty qalasyndaǵy bir kóshege, Temir qalasyndaǵy orta mektepke ǵalymnyń esimi berilgen.
106 jyl buryn (1912-1992) belgili etnolog, XX ǵasyrdyń kórnekti eýrazııashyl ǵalymy, tarıhshy-etnolog, tarıh jáne geografııa ǵylymdarynyń doktory, aqyn, parsy tilinen aýdarmashy GÝMILEV Lev Nıkolaevıch dúnıege keldi.
Ol - Etnogenez passıonarlyq teorııasynyń avtory. Qazaqstannyń ejelgi tarıhyn jetik bilgen. Reseı jaratylystaný ǵylymı akademııasynyń akademıgi, geografııa jáne tarıh ǵylymynyń doktory, uly dala halyqtarynyń tarıhyn zerttegen maman.
Reseıdegi Tsarskoe selosynda dúnıege keldi. Aqyn Nıkolaı Gýmılev pen aqyn Anna Ahmatovanyń uly. Balalyq shaǵyn Tver gýbernııasynyń Slepnevo atyndaǵy Bejetsk ýezinde ájesiniń qolynda ótkizgen. 1917 - 1929 jyldary aralyǵynda Bejetsk qalasynda turdy. Bejetsk qalasynyń №1 mektebinde 1926 jyldan 1929 jylǵa deıin bilim aldy. Al 1930 jyly Lenıngradta oqydy. 1930-1934 jyldary Saıan, Pamırdegi, Qyrymdaǵy ekspedıtsııalarda jumys istedi. 1934 jyly Gýmılev Lenıngrad ýnıversıtetiniń tarıh fakýltetine túsip, Batys pen Shyǵystyń ózderine tán ár túrli mádenıetteriniń bir-birimen baılanysy, sonymen qatar erte orta ǵasyrlardaǵy halyqtardyń tarıhı máseleleri qamtylǵan alǵashqy «Ýdelno-lestnıchnaıa sıstema ý tıýrok v VI - VIII vv.» maqalasyn jaza bastaıdy. Birinshi ret 1935 jyly túrmege qamalady, biraq anasynyń aralasýymen kóp ýaqyt ótpeı bosatylady. 1938 jyly Gýmılev qaıta túrmege qamalyp, 5 jylǵa bas bostandyǵynan aıyrylady. 1944 jyly óz erkimen maıdanǵa ketip, 1945 j. Berlın operatsııasyna qatysady. 1945-1948 jyldary ýnıversıtetti jedel (ekstern) túrde bitirip, «Polıtıcheskaıa ıstorııa pervogo tıýrkskogo kaganata (546-656)» atty kandıdattyq dıssertatsııa qorǵady. Tutqynda júrgende «Hýnný» kitabyn jazyp, ol kitap keıinnen «Stepnaıa trılogııa» kitabynyń bir bóligi boldy: «Hýnný» (1960), «Drevnıe tıýrkı» (1967), «Poıskı vymyshlennogo tsarstva» (1970). Alǵashqy eki kitabynda Gýmılev uly dala etnosynyń tarıhyn sýrettese, «Poıskı vymyshlennogo tsarstva» bóliginde eýropalyqtardyń Eýrazııa dalasynyń turǵyndaryna aldyn ala jospar boıynsha jasalǵan qarym-qatynastarynyń qalaı týyndaǵany kórsetilgen. 60-70 jyldarda Gýmılevtiń ǵylymı eńbekteriniń tarıhı qurylymy jalpylama túrde qabyldanǵan keńestik tarıhı ǵylymnan túbegeıli aıryqsha boldy, sondyqtan da onyń jumystary teris baǵalandy. Gýmılevtiń zertteý ádisteri tolyq kólemde «Etnogenez ı bıosfera Zemlı» (1989) maqalasynda kórsetilgen. Gýmılevtiń tarıh ǵylymyna qosqan negizgi úlesi «Drevnıaıa Rýs ı Velıkaıa step» (1989) maqalasy boldy. Onda IX-XII ǵasyrlardaǵy Eýrazııa etnostarynyń bir-birine ózara áserleri qarastyrylǵan. Avtordyń aıtýy boıynsha, tarıh uzaq ýaqyt boıy eýroortalyqtandyrýshylyq ustanymmen baǵalandy. Gýmılev tarıhtyń mindeti tsıvılızatsııanyń («sýperetnostarmen») aýysýyna qatysty, tarıhı protsesterdiń mánine baılanysty etnostardyń damýyn oqyp úırený dep sanady. Tarıhı zertteýlerdegi osy baǵyt qazirgi ýaqytta júzege asa bastady. 1991 jyly Reseı jaratylystaný ǵylymdarynń akdemıgi (RAEN) bolyp tańdaldy. Zeınetke shyqqanǵa deıin 1986 jyly Lenıngrad memlekettik ýnıversıtetiniń geografııa Ǵylymı-zertteý ınstıtýtynda jumys istedi. 1992 jyly 15 maýsymda Sankt-Peterbýrgte qaıtys boldy. 2005 jyly tamyzda Qazanda «Sankt-Peterbýrg kúnderine jáne Qazan qalasynyń myńjyldyǵyn toılaýyna baılanysty» Lev Gýmılevke eskertkish qoıyldy, onda mynandaı sózder jazylǵan: «Ómir boıy tatarlardy jala jabýdan qorǵaǵan orys adamyna». Qazaqstan Prezıdenti Nursultan Nazarbaevtyń jeke bastamasymen 1996 jyly Qazaqstan Respýblıkasynyń elordasy Astanadaǵy joǵary oqý oryndarynyń biri Eýrazııa ulttyq ýnıversıteti Gýmılevtiń esimimen ataldy. 2002 jyly ýnıversıtet qabyrǵasynda L. N. Gýmılevtiń kabınet-murajaıy quryldy.
100 jyl buryn (1918-1977) qazaqstandyq ushqysh, eki márte Keńes Odaǵynyń Batyry LÝGANSKII Sergeı Danılovıch dúnıege keldi.
Almaty qalasynda týǵan. Orynbordaǵy ushqyshtar mektebin, Máskeýdegi áskerı-áýe akademııasyn bitirgen. 1939-1940 jyldary keńes-fın soǵysyna qatysty. Uly Otan soǵysy kezinde 390 ret ushý saparyna shyǵyp, jaýdyń 37 ushaǵyn atyp túsirdi. Soǵystan keıingi jyldary KSRO Qarýly Kúshteriniń áskerı áýe kúshteri salasynda ár túrli joǵary basshylyq qyzmetterde boldy.
«Lenın», «Aleksandr Nevskıı», 2 márte «Qyzyl Tý», «Qyzyl Juldyz» ordenderimen, kóptegen medaldarmen marapattalǵan.
77 jyl buryn (1941) Táýelsiz Qazaqstannyń tuńǵysh syrtqy ister mınıstri, dıplomat, saıasattaný ǵylymynyń doktory SÚLEIMENOV Tóleýtaı Ysqaquly dúnıege keldi.
Semeı qalasynda týǵan. Qaraǵandy polıtehnıkalyq ınstıtýtyn, KSRO SІM Dıplomatııalyq akademııasyn bitirgen. 1971-1977 jyldary - Qazaqstan LKJO Temirtaý qalalyq komıtetiniń birinshi hatshysy, qalalyq baqylaý komıtetiniń tóraǵasy, qalalyq partııa komıtetiniń ekinshi hatshysy. 1980-1981 jyldary - KSRO SІM Orta Shyǵys elderi bóliminiń birinshi hatshysy. 1981-1985 jyldary - KSRO-nyń Aýǵanstannyń Mazarı-Sharıf qalasyndaǵy Bas ókildiginiń (konsýlstvo) konsýly. 1985-1988 jyldary - KSRO SІM Orta Shyǵys elderi bóliminiń keńesshisi. 1988-1991 jyldary - KSRO-nyń Irandaǵy Elshiliginiń keńesshisi. 1991-1994 jyldary - QR Syrtqy ister mınıstri. 1994-1996 jyldary - QR-dyń AQSh-taǵy Tótenshe jáne Ókiletti Elshisi. 1996-2001 jyldary - QR-dyń Vengrııadaǵy Tótenshe jáne Ókiletti Elshisi, QR-dyń Polsha, Bolgarııa, Chehııa, Slovakııa jáne Rýmynııadaǵy Tótenshe jáne Ókiletti Elshisi qyzmetin qosa atqarýshy. 2001-2003 jyldary - QR-dyń Belgııadaǵy Tótenshe jáne Ókiletti Elshisi, QR-dyń Lıýksembýrg Uly gertsogtyǵyndaǵy, Nıderlandy Koroldigindegi Tótenshe jáne Ókiletti Elshisi jáne QR-dyń Eýropalyq Odaq jáne Soltústik-Atlantıkalyq shart uıymy janyndaǵy ókildigi basshysy qyzmetin qosa atqarýshy. 2003-2005 jyldary - QR-dyń Polshadaǵy Tótenshe jáne Ókiletti Elshisi boldy. Dıplomatııa ınstıtýtynyń dırektory.
«Qurmet belgisi», Qurmet, Vengrııanyń Orta Krest, Slovakııanyń Qos krestiń aq ordenimen jáne medaldarmen marapattalǵan.
57 jyl buryn (1961) Qazaqstan halqy Assambleıasy tóraǵasynyń burynǵy orynbasary VIShNıAK Sergeı Vıktorovıch dúnıege kelgen.
Ol Aqtóbe qalasynda týǵan. Q. Jubanov atyndaǵy Aqtóbe pedagogıkalyq ınstıtýtyn ekonomıka jáne menedjment mamandyǵy boıynsha bitirgen (1997).
Eńbek joly: Aqtóbe hrom qosyndylary zaýytynda energotseh slesary, apparatshy, aýysym sheberi, 4-tseh bóliminiń bastyǵy, zaýyt qondyrǵylary bóliminiń bastyǵy, zaýyt komplektatsııalaý bóliminiń jetekshi ınjeneri (1978-1998); túrli kommertsııalyq uıymdarda basshy laýazymdarynda (1998-2000); «Dınar-Elektromash» JShS («Energııa» fırmasy) is basqarýshysy (2000 jyldan); Aqtóbe oblystyq máslıhatynyń depýtaty, bıýdjet, ekonomıka, ónerkásip jáne kásipkerlik jónindegi turaqty komıssııanyń múshesi (2016 jyldan).
2017 jylǵy sáýir - 2018 jylǵy mamyr aılary aralyǵynda Qazaqstan halqy Assambleıasy tóraǵasynyń orynbasary bolyp qyzmet atqarǵan.
«Qurmet» jáne Qasıetti Knıaz Danııl Moskovskııdiń ІІІ dárejeli ordenderimen, «Alǵys», «Qazaqstan ulttyq gvardııasyna HH jyl», «Qazaqstan halqy Assambleıasyna 20 jyl» medaldarymen, Qazaqstan Respýblıkasy Prezıdentiniń «Qazaqstan halqynyń birligin nyǵaıtýǵa jáne qaıyrymdylyqty damytýǵa qosqan úlesi úshin» alǵys hatymen marapattalǵan. Aqtóbe oblysynyń «El birligi», «Jyl adamy» nomınatsııalary boıynsha Qazaqstan patrıoty ataǵy berildi.
56 jyl buryn (1962) Jambyl oblysynyń ákimi MYRZAHMETOV Asqar Isabekuly dúnıege keldi.
Almaty zooveterınarlyq ınstıtýtyn (1984); Búkilodaqtyq mal sharýashylyǵy ǵylymı-zertteý ınstıtýtynyń aspırantýrasyn (Máskeý, 1988); Qazaq menedjment jáne marketıng ınstıtýtyn (Almaty, 1997) bitirgen.
Aýyl sharýashylyǵy ǵylymdarynyń kandıdaty (1988). «Nur Otan» HDP múshesi.
1988 jyldan - BAAShǴZZ Shyǵys bólimshesi júıesinde kishi ǵylymı qyzmetker, aǵa ǵylymı qyzmetker. 1991 jyldan - «Qazaqstan» respýblıkalyq bırjasy» AQ vıtse-prezıdenti. 1994 jyldan - «TASMO» ınvestıtsııalyq kommertsııalyq ortalyǵynyń bas dırektory. 1995 jyldan - «Agro-Lızıng» AQ bas dırektory. 1999 jyldan - QR aýyl sharýashylyq vıtse-mınıstri. 2002 jyldan - QR aýyl sharýashylyq birinshi vıtse-mınıstri - QR Aýyp sharýashylyq mınıstrligi Orman jáne ańshylyq sharýashylyq komıtetiniń tóraǵasy. 2005 jyldan - QR aýyl sharýashylyq mınıstri.
2006 jyldan - Ózbekstan Respýblıkasyndaǵy QR Tótenshe jáne Ókiletti Elshisi. 2007 jyldan - «Ońtústik» ÁKK» UK» AQ basqarmasynyń tóraǵasy. 2009 jyldan - Ońtústik Qazaqstan oblysynyń ákimi. 2015 jyldan - Nur Otan partııasy Tóraǵasynyń Birinshi orynbasary. 2016 jyldyń mamyr aıynan - Qazaqstan Respýblıkasynyń Aýyl sharýashylyǵy mınıstri. 2016 jyldyń maýsym aıynan 2018 jyldyń qańtar aıyna deıin aralyǵynda QR Premer-Mınıstriniń orynbasary - Aýyl sharýashylyǵy mınıstri qyzmetin atqarǵan.
Qazirgi qyzmetinde - 2018 jyldyń qańtar aıynan beri.
Orta Azııa jáne Qazaqstannyń Bırjalar qaýymdastyǵyna, Qazaqstan Kásipkerler forýmynyń keńesine basshylyq etken, QR Premer-mınıstriniń shtattan tys keńesshisi bolǵan.
6 medalmen marapattalǵan.
55 jyl buryn (1963) Qazaqstan Respýblıkasy Іshki ister mınıstriniń orynbasary, polıtsııa general-maıory BISENQULOV Berik Baıboluly dúnıege keldi.
Gýrev oblysy, Dossor kentinde dúnıege kelgen. Bilimi joǵary. 1985 jyly V.I.Lenın atyndaǵy Qazaq polıtehnıkalyq ınstıtýtyn, 1994 jyly QR ІІM Qaraǵandy joǵary mektebin bitirgen.
Quqyq qorǵaý organdaryndaǵy qyzmetin 1986 jyly Mańǵyshlaq oblystyq atqarý komıteti ІІB MAI bóliminiń jol baqylaý ınjeneri qyzmetinen bastady.
1986-2001 jyldary Mańǵyshlaq oblysy atqarý komıtetiniń ІІB-da, sondaı-aq, Almaty qalasy ІІBB-de túrli basshylyq laýazymdardy atqardy. 2001-2003 jyldary Almaty qalasy ІІBB Jol polıtsııasy basqarmasynyń bastyǵy. 2003-2007 jyldary Almaty qalasy ІІD bastyǵynyń orynbasary. 2007-2009 jyldary Qazaqstan Respýblıkasy Tótenshe jaǵdaılar jónindegi mınıstriniń keńesshisi. 2009-2010 jyldary Almaty oblysy ІІD bastyǵynyń orynbasary. 2010-2011 jyldary Kóliktegi ІІD bastyǵynyń orynbasary. 2011-2013 jyldary Qazaqstan Respýblıkasy ІІM Jol polıtsııasy komıtetiniń tóraǵasy. 2013-2014 jyldary Qazaqstan Respýblıkasy ІІM Kóliktegi ІІD bastyǵy. 2014 jyldyń tamyzynan bastap qazirgi qyzmetinde.
53 jyl buryn (1965) Jambyl oblysy T. Rysqulov aýdanynyń ákimi QYRYQBAEV Asqar Sanatuly dúnıege kelgen.
Jambyl oblysynda týǵan. Qazaq aýyl sharýashylyǵy ınstıtýtyn (1988), T.Rysqulov atyndaǵy Qazaq basqarý akademııasyn (2000) bitirgen, ınjener-mehanık, ekonomıst.
Eńbek joly: Jambyl oblysy, Lýgovoı aýdany, Quraǵaty sovhozynyń egis brıgadasynyń jumysshysy (1982); Qazaq aýyl sharýashylyǵy ınstıtýtynyń stýdenti (1982-88); Almaty qalasyndaǵy orta kásiptik-tehnıkalyq ýchılışeniń oqytýshysy (1988-89); Almaty oblystyq avtoservıs jáne saýda kásipornynyń tehnıka qaýipsizdigi boıynsha ınjeneri, shuǵyl jóndeý sheberi, bastyqtyń ekonomıka jáne saýda jónindegi orynbasary (1989-93); «Aq-Bulaq» JShS bas dırektory (1997-2000); «Taý-Samal» JShS bas dırektory (2000-02); «Qazaqstan temir joly» UK» AQ fılıaly - «Almaty magıstraldyq temirjol jelisi bólimshesi» dırektorynyń ekonomıka jáne qarjy jónindegi orynbasary (2002-06); «Qazaqstan temir joly» UK» AQ atqarýshy dırektory (2006-08); «Lokomotıv-Servıs» AQ atqarýshy dırektory (2008-12); 2012 jyldyń qyrkúıek aıynyn bastap bastap QR Indýstrııa jáne jańa tehnologııalar mınıstrliginiń Tehnıkalyq retteý jáne metrologııa komıtetiniń Jambyl oblysy boıynsha departamentiniń dırektory.
Qazirgi laýazymyn 2017 jyldyń shildesinen beri atqaryp keledi.
48 jyl buryn (1970) Qostanaı oblysy ákimi apparatynyń basshysy ÁBENOV Arman Tarǵynuly dúnıege kelgen.
Qostanaı oblysy Naýryzym aýdanynyń Qaramaıshy selosynda týǵan. 1993 jyly K.A. Tımırıazev atyndaǵy Máskeý aýyl sharýashylyǵy akademııasyn, 2009 jyly A. Baıtursynov atyndaǵy Qostanaı memlekettik ýnıversıtetin jáne Almaty qalasyndaǵy Halyqaralyq bıznes ýnıversıtetin ǵalym agronom, ekonomıka bakalavry, memlekettik jáne jergilikti basqarý magıstri mamandyqtary boıynsha támamdaǵan. 1987-1988 jyldary Qostanaı oblysy Naýryzym aýdanynyń «Pervaıa semıletka» sovhozynda ósimdik sharýashylyǵy jumysshysy, qurylys bóliminiń jumysshysy. 1988-1993 jyldary K.A. Tımırıazev atyndaǵy Moskva aýyl sharýashylyǵy akademııasynyń stýdenti. 1993-2000 jyldary Torǵaı oblysy Oktıabr aýdany «Terekti» sovhozynyń óndiristik bólimi boıynsha agronom - brıgadır, bas agronom, dırektordyń orynbasary. 2000 - 2003 jyldary Qostanaı aýdany ákiminiń apparaty uıymdastyrý-baqylaý jáne kadrlar jumystary bóliminiń bas mamany. 2003 - 2004 jyldary Qostanaı oblysy ákiminiń apparaty uıymdastyrý-baqylaý jáne kadrlar jumystary bóliminiń baqylaý jónindegi oblys ákiminiń bas ınspektory. 2004-2005 jyldary Qostanaı oblystyq Qostanaı aýdany ákiminiń orynbasary. 2005-2007 jyldary Qostanaı oblysy Taran aýdanynyń ákimi. 2007-2008 jyldary Qostanaı oblysy Jitiqara aýdanynyń ákimi. 2008 - 2010 jyldary Qazaqstan Respýblıkasy Prezıdenti Ákimshiliginiń memlekettik baqylaý jáne uıymdastyrý-aýmaqtyq jumystary bóliminiń memlekettik ınspektory. 2010-2011 jyldary Qostanaı oblysy ákiminiń orynbasary. 2011 jyldyń maýsym aıynan bastap Qostanaı oblysy ákimi apparatynyń basshysy.
41 jyl buryn (1977) QR Prezıdenti Ákimshiligi sektorynyń meńgerýshisi ShOIKIN Ǵalym Nurmaǵambetuly dúnıege keldi.
Kókshetaý oblysynda dúnıege keldi. L.N.Gýmılev atyndaǵy EUÝ-di, Qazaqstan Respýblıkasy Prezıdenti janyndaǵy memlekettik qyzmet Akademııasyn bitirgen. Saıasattanýshy, memlekettik qyzmet menedjeri, saıası ǵylymdar kandıdaty.
QR Mádenıet mınıstrliginde, QR Prezıdenti Ákimshiligi Іshki saıasat bóliminiń bas sarapshysy, sektor meńgerýshisi, 2009 jyldyń qyrkúıeginen «Nur Otan» HDP Aqmola oblystyq fılıaly tóraǵasynyń birinshi orynbasary, Qazaqstan Respýblıkasy Din isteri agenttigi tóraǵasynyń orynbasary qyzmetterin atqardy. 2014-2016 jyldary Qazaqstan Respýblıkasy Mádenıet jáne sport mınıstrliginiń Din isteri komıtetiniń tóraǵasy qyzmetin atqardy.
2016-2017 jyldary QR Din isteri jáne azamattyq qoǵam mınıstrliginiń Din ister komırtetiniń tóraǵasy bolyp jumys jasaǵan.
Qazirgi qyzmetinde 2017 jyldyń jeltoqsan aıynan beri.
38 jyl buryn (1980) Qazaqstan Respýblıkasy Qorǵanys jáne aeroǵarysh ónerkásibi mınıstriniń keńesshisi ShABANBAEV Qadyr Ómirzaquly dúnııege keldi.
Qaraǵandy oblysynda týǵan. E.A. Bóketov atyndaǵy Qaraǵandy memlekettik ýnıversıtetin quqyqtaný (2001), Qaraǵandy memlekettik tehnıkalyq ýnıversıtetin geologııa jáne munaı men gazdyń ken ornyn barlaý (2008) mamandyqtary boıynsha aıaqtaǵan, «Bolashaq» Qaraǵandy ýnıversıtin quqyq magıstri (2012) dárejesimen támamdady.
Eńbek joly: Qaraǵandy oblysy ІІD-niń tergeýshisi (2002); «Valıýt-Tranzıt Bank» AQ-da zańger (2006-2008); «Qazaqmys korporatsııasy» JShS-da bas maman (2006-2008); Qaraǵandy oblysy ákimi apparatynda ártúrli qyzmetter atqarǵan (2011-2012); Qazaqstan Respýblıkasy Premer-mınıstriniń kómekshisi (2012-2014); Qazaqstan Respýblıkasy Qorǵanys mınıstriniń keńesshisi (2014-2016) bolǵan.
Qazirgi qyzmetinde 2017 jyldan beri.
152 jyl buryn (1865-1935) frantsýz kompozıtory Pol DıÝKA dúnıege keldi.
136 jyl buryn (1881-1956) amerıkandyq ushaq jasaýshy, avıa jasaý kompanııasynyń negizin qalaýshy Ýılıam BOING dúnıege keldi.
107 jyl buryn (1910-1956) shyǵystanýshy, tarıh ǵylymdarynyń doktory, professor, Ortalyq Azııany mekendegen túrki tildes halyqtardyń tarıhyn zertteýshilerdiń biri BERNShTAM Aleksandr Natanovıch dúnıege keldi.
Reseıdiń Kerch qalasynda týǵan. Lenıngrad ýnıversıtetin bitirgen. 1936 jyldan bastap jyl saıyn uıymdastyrylyp, Bernshtam basqarǵan arheologııalyq ekspedıtsııalar soltústikte Qarataý jotalarynan, ońtústikte Pamır taýlaryna deıingi, shyǵysta Іleden, batysta Zeravshan ústirtine deıingi jerlerdi zerttep, Ortalyq Azııa halyqtarynyń kóne tarıhyna qatysty mańyzdy málimetter jınaǵan. Ol 1930-1940 jyldary qazaq-qyrǵyz tarıhyna qatysty tyń máseleler kóterip, saq-úısin, jáne túrki dáýirin zertteýge eleýli úles qosty. Arheologııalyq materıaldarǵa súıenip, Teriskeı Qyrǵyz ólkesiniń qola dáýirden XV ǵasyrǵa deıingi tarıhyn túbegeıli taldaıdy. Onyń 250-deı eńbekteri men maqalalary bar.