1 qazan kúni «Astana Opera» mýzyka kúnin atap ótedi
NUR-SULTAN. QazAqparat - Mýzyka kúninde «Astana Opera» Kameralyq zalynda ótetin «Máńgi óshpes iz qaldyrǵan» sımfonııalyq kontsertter toptamasy barokko dáýiriniń ataqty kompozıtory A.Vıvaldıdiń týyndylarynan quralǵan biregeı baǵdarlamamen ashylmaq. 1 qazan kúni Qazaqstanda alǵash ret «Azat etilgen Andromeda» operasynan Perseıdiń arııasy shyrqalady. «Astana Opera» kameralyq orkestri Qazaqstannyń eńbek sińirgen qaıratkeri Abzal Muhıtdınovtyń jetekshiligimen óner kórsetedi, dep habarlaıdy QazAqparat teatrdyń baspasóz qyzmetine silteme jasap.
- Kontsertimiz XVIII ǵasyrdaǵy mýzyka óneriniń kórnekti ókilderiniń biri Antonıo Vıvaldı shyǵarmashylyǵyna arnalady. Eki bólimnen turatyn keń aýqymdy da qyzyqty baǵdarlamaǵa «Baıazet» operasynan Irena jáne «Grızelda» operasynan Konstantsanyń sırek oryndalatyn arııalary, áıgili «Jyl mezgilderi» toptamasy, eki skrıpka men orkestrge arnalǵan kontsert, eki goboı men orkestrge arnalǵan kontsert, fagot pen orkestrge arnalǵan kontsert engen. Osy toptama aıasynda biz tyńdarman nazaryna barokko dáýirimen baılanysty G.Persell, I.S.Bah, G.F.Gendel, T.D.Albınonı syndy birqatar kompozıtorlardy usynýdy josparlaýdamyz. Teatr ártisterimen birge sahna tórine Qazaqstan men shetelden shaqyrtylǵan mýzykanttar shyǵady. Kontsertter birshama ózgeshe formatta ótetin bolady, kórermenderge ázirlegen tosynsyıymyz kóp, - dedi joba avtory, dırıjer Abzal Muhıtdınov.
«Máńgi óshpes iz qaldyrǵan» atty sımfonııalyq kontsertterdiń jańa toptamasy kórermenderdi tyń janrlardyń negizin salyp, olardyń bolashaqta damýyn anyqtaǵan kórnekti kompozıtorlarmen, mýzykalyq baǵyt ókilderimen tanystyrýǵa baǵyttalǵan. Toptama Antonıo Vıvaldıdiń shyǵarmashylyǵymen ashylady, ol daryndy skrıpkashy jáne kompozıtor retinde bes kúnniń ishinde úsh bólimdi opera mýzykasyn jaza alatyn ári bir taqyrypta kóptegen varıatsııalardy qurastyrýǵa qabiletti kompozıtor retinde keńinen tanymal bolǵan. Vıvaldıdiń aspaptyq kontsertteri klassıkalyq sımfonııanyń qalyptasý jolyndaǵy kezeń bolyp tabylady.
Sondaı-aq kontsertke teatrdyń jetekshi solısi, Bashqurtstannyń eńbek sińirgen ártisi Alfııa Karımova (soprano), Batyrjan Smaqov (kontrtenor), «Astana Opera» orkestriniń solısi jáne birinshi skrıpkasy, Qazaqstannyń eńbek sińirgen qaıratkeri Baǵdat Ábilhanov, «Mádenıet qaıratkeri» Aısulý Baıkenova, Mádına Kapeý (skrıpkalar), Áset Neldibaev (fagot), Damılıa Mahpırova, Nurgúl Saparova (goboılar) qatysady.
Júrgizýshi – «Mádenıet qaıratkeri» Marjan Jákenova.
Kontserttiń bastalýy - saǵat 19.00-de.
