1 qarashaǵa deıin salyq tólemegenderdiń isi sotqa jiberiledi

ALMATY. QazAqparat - Almaty memlekettik kirister departamenti salyq tólemegen boryshkerlerdiń isin sotqa jibere bastady, dep habarlaıdy QazAqparat tilshisi.

Medeý aýdany memlekettik kirister basqarmasy múlik salyǵy men jer salyǵy boıynsha qaryzdardy óteý jumystary júrip jatyr.

Búginde tek Medeý aýdanynyń ózinde 4 765 jeke tulǵa 1 AEK-ten (2 405 teńge) asatyn múlik pen jer salyǵyna jalpy alǵanda 191 mln teńge qaryz.

Bul adamdar 2017 jylǵy múlik jáne jer salyǵyn tólemegen.

Zańǵa sáıkes, salyqty bıyl 1 qazanǵa deıin tóleýi tıis bolatyn. Alaıda boryshkerler qaryzdy óteýge asyqpaı otyr.

Bıyl 1 qarashadan bastap 1 AEK-ten astam salyq bereshegi bar tulǵalardyń qujattary tikeleı atqarýshy organ qyzmetkerlerine beriledi.

Salyq kodeksine  engizilgen ózgerister men tolyqtyrýlardyń arqasynda 2018 jyldan bastap salyq organy bereshekti óndirip alý týraly erejeler engizdi. Osyǵan oraı, materıaldardy tikeleı quqyq qorǵaý organdaryna tapsyrý qolǵa alynady.

2018 jylǵa deıin bul protsess sot organdary arqyly júzege asyrylǵan. Sondyqtan, is  uzaqqa sozylyp júrdi.

Qujat sot oryndaýshylaryna tapsyrylǵannan keıin banktegi shot toqtatylyp, múlikke tyıym salynady jáne QR-nan tys jerde júrýge shekteý qoıylady.

Sondaı-aq, qaryzy bar azamat bereshek somamen qosa, qaryzdyń 25 paıyzyn qosa tóleıdi. Bul qarajat sot prıstavtary úshin alynady. Máselen, salyq bereshegi 100 myń teńge bolsa, sot prıstavtarynyń qyzmetteri 25 myń teńge bolady. Nətıjesinde boryshkerdiń shyǵyny 125 myń teńgege deıin artady. Al resmı qaıta qarjylandyrý stavkasy tólenbegen jaǵdaıda, keshiktirilgen árbir kún úshin 1,25 ese mólsherde ósim qosylyp otyrady.

Salyq kodeksi jańarǵaly beri múlik, jer salyǵyn jáne kólik quraldaryna salyq tóleý birshama jeńildedi. Endi respýblıkanyń barlyq salyq organdary qazannyń sońyna deıin senbi kúnderi saǵat 10.00-14.00 aralyǵynda túski úzilissiz jumys isteıdi.