1 qarashadan bastap ne ózgeredi: munaı baǵasy, jańa áýe reısteri men joldar
ASTANA. KAZINFORM — Qarashada elimizdiń kólik jáne týrızm salalarynda bolatyn birqatar jańalyq pen oqıǵany nazaryńyzǵa usynamyz.
Áýe reısi men jańa ushaqtar
Almaty týrızm bıýrosy 30 qarashadan bastap Air Astana kompanııasy Almatydan Tokıoǵa tikeleı reıs oryndaıtynyn habarlady.
Reıster aptasyna eki ret Airbus A321LR áýe kemesimen júzege asyrylyp, ushaq Narıta (NRT) áýejaıynda qonady. Týrızm bıýrosy osy reıs arqyly Qazaqstan men Japonııa arasynda eki eldiń azamattary emin-erkin, jyldam ári yńǵaıly túrde saıahattaı alatynyn atap ótti. Odan bólek, aldaǵy ýaqytta Almatyny Japonııa naryǵynda ilgeriletýge baǵyttalǵan jańa birlesken jobalar atqarylatynyn málimdedi.
Júk tasymaly sektorynda da jańalyq bar. Qazaqstannyń ulttyq júk tasymaldaýshysy áýe flotyna Airbus A340 ushaqtaryn satyp almaq. Bul týraly osy aptada ótken Úkimet otyrysynda Kólik vıtse-mınıstri Talǵat Lastaev baıandady. Onyń sózinshe, Alǵashqy áýe kemesi bıyl qarashada, ekinshisi keler jyldyń naýryz aıynda jetkiziledi.
Kólik vıtse-mınıstriniń sózine júginsek, «Eır Kargo» kompanııasy áýe kemelerin jetkizý jóninde kelisimshartqa qol qoıǵan. Jańa eki ushaq qatarǵa qosylǵan soń, áýe kemeleriniń jalpy sany 10-ǵa jetedi.
Qurylys
Sonymen qatar, qarasha aıynda Úlken Almaty kóline aparatyn jańa soqpaq ashylady. Búginde Almatydaǵy jańa «Mármár» týrıstik soqpaǵynyń qurylysy aıaqtalýǵa jaqyn.
Qalalyq týrızm basqarmasynyń málimetinshe, qazirgi ýaqytta Úlken Almaty kóline tikeleı aparatyn uzyndyǵy 5,3 shaqyrym jańa jaıaý júrginshiler baǵytyn abattandyrý jumystary júrgizilip jatyr. Jobany 2026 jylǵy qarasha aıynyń sońyna deıin tolyq aıaqtaý josparlanǵan. Marshrýt boıynda sholý jáne demalys alańdary, baspaldaqtar, ótkelder, aqparattyq taqtalar men baǵyttaýshy belgiler qarastyrylǵan.
– Jańa soqpaq Almatynyń eń kórikti jerleriniń biri - Úlken Almaty kóline jaıaý barýdy barynsha jaıly, qoljetimdi ári qaýipsiz etedi, - dep habarlady basqarma.
Al Shyǵys Qazaqstanda Qatonqaraǵaıǵa barýdy jeńildetetin jańa jol qarashada iske qosylady. Uzyndyǵy 12 shaqyrymǵa jýyq Osınov asýyn aınalyp ótetin baǵyt qazirgi joldy shamamen 6 shaqyrymǵa qysqartady ári qysta qozǵalysy kúrdelenetin ýchaskedegi qaýipsizdikti arttyrady.
Jýyrda atalǵan ýchaskedegi qurylys barysyn tekserýge oblys ákimi Nurymbet Saqtaǵanov arnaıy bardy. Onyń sózinshe, búginde uzyndyǵy 12 shaqyrymǵa jýyqtaıtyn joldyń negizgi bóligi daıyn. Joldy qarasha aıynyń birinshi onkúndiginde paıdalanýǵa berý josparlanyp otyr. Qazirgi ýaqytta kópir qurylysyn aıaqtaý ǵana qaldy.
– Jańa joldaǵy kópirdiń uzyndyǵy 176 metr, al bıiktigi 45 metrdi quraıdy. Joldyń taǵy bir mańyzdy ereksheligi - onyń burynǵy aınalma baǵytpen salystyrǵanda shamamen 6 shaqyrymǵa qysqa bolýy. Bul júrgizýshilerdiń ýaqytyn únemdeýge múmkindik beredi, - dedi Nurymbet Saqtaǵanov.
Munaı baǵasy
Elimiz úshin asa mańyzdy taǵy bir jaıtty jazǵan jón. OPEK+ elderi qarashada munaı óndirisiniń qazirgi deńgeıin saqtaýǵa kelisti. Jýyrda Saýd Arabııasy, Reseı, Irak, Kýveıt, Qazaqstan, Aljır jáne Oman ókilderiniń onlaın kezdesýinen keıin osyndaı sheshim qabyldandy.
Ortaq sheshimge sáıkes, 2026 jyldyń qyrkúıegine belgilengen mindetti óndiris deńgeıi qarasha aıynda da saqtalady, ıaǵnı odaq eki aı boıy óndiris kólemin ulǵaıtpaıdy.
Kezdesýge qatysýshylar yntymaqtastyq týraly kelisimdi ustanatynyn rastap, álemdik munaı naryǵyn odan ári baqylaýǵa nıetti ekenin bildirgen edi.
Sonymen birge, OPEK+ uıymyna múshe jeti eldiń kelesi kezdesýi 2026 jyldyń 1 qarashasyna josparlanǵan.
Eske salaıyq, buǵan deıin 1 qazannan ne ózgergenin jazǵanbyz.
