1 qarashadan bastap Kókshetaýda jolaqy tóleýdiń jańa júıesi engiziledi
KÓKShETAÝ. QazAqparat – Bıylǵy 1 qarashadan bastap Kókshetaý qalasynda qalaishilik baǵyttaǵy avtobýsta júrý aqysyn tóleýdiń jańa júıesi engiziledi, dep habarlaıdy QazAqparat tilshisi qala ákimdigine silteme jasap.
«1 qarashadan bastap Kókshetaý qalasynda ákimdik qaýlysynyń talaptary zańdy kúshine enedi», - delingen qala ákimdiginiń áleýmettik jelidegi resmı paraqshasynda.
Jazbada kórsetilgendeı, kólik kartalary arqyly qolma-qol aqshasyz tóleý kezinde eresekterge – 80 teńge mólsherinde,
jeti jastan on bes jasqa deıingi balalarǵa (mektep derbestendirilgen kólik kartasy boıynsha) - 40 teńge belgilenip otyr. ⠀
Al, qolma-qol aqshamen tóleý kezinde eresekterge - 150 teńge, on bes jasqa deıingi balalarǵa - 70 teńge mólsherinde jolaqy belgilenip otyr.
Sondaı-aq, Kókshetaý qalasynda qoǵamdyq kólikte jeńildikpen jol júrýge quqyǵy bar azamattardyń sanattary belgilendi: ⠀
1) Uly Otan soǵysynyń qatysýshylary men múgedekterine. ⠀
2) Uly Otan soǵysy jyldarynda tyldaǵy janqııarlyq eńbegi men minsiz áskerı qyzmeti úshin burynǵy KSR Odaǵynyń ordenderimen jáne medaldarymen marapattalǵan adamdarǵa, sondaı-aq 1941 jylǵy 22 maýsym-1945 jylǵy 9 mamyr aralyǵynda keminde alty aı jumys istegen (áskerı qyzmet ótkergen) jáne Uly Otan soǵysy jyldarynda tyldaǵy janqııarlyq eńbegi men minsiz áskerı qyzmeti úshin burynǵy KSR Odaǵynyń ordenderimen jáne medaldarymen marapattalmaǵan adamdarǵa. ⠀
3) Qorshaýdaǵy Lenıngrad turǵyndaryna. ⠀
4) fashıstik lagerlerdiń tutqyndaryna. ⠀
5) Birge turatyn tórt jáne odan da kóp kámeletke tolmaǵan balalary bar analarǵa, «Altyn alqa», «Kúmis alqa» alqalarymen marapattalǵan nemese buryn «Batyr ana» ataǵyn alǵan, sondaı-aq І jáne ІІ dárejeli «Ana dańqy» ordenderimen marapattalǵan analarǵa. ⠀
6) Kópbalaly az qamtylǵan otbasylardan shyqqan mektep jasyndaǵy balalarǵa. ⠀
7) On alty jasqa deıingi múgedek balalarǵa. ⠀
8) Kókshetaý qalasynyń qurmetti azamattaryna.
9) Aýǵanstan Demokratııalyq Respýblıkasynda urys qımyldarynyń qatysýshylary men múgedekterine.
10) Chernobyl apatynyń zardaptaryn joıýǵa qatysýshylar men múgedekterge.
11) Semeı ıadrolyq polıgonynda ıadrolyq synaqtarǵa tikeleı qatysqan adamdarǵa.
12) Saıası qýǵyn-súrgin qurbandaryna, múgedektigi bar nemese zeınetker bolyp tabylatyn saıası qýǵyn-súrginnen zardap shekken adamdarǵa.
13) I toptaǵy kórý boıynsha múgedekterge, sondaı-aq sot áreketke qabiletsiz dep tanyǵan adamdarǵa jáne Qazaqstan Respýblıkasynyń zańnamasynda belgilengen tártippen taǵaıyndalǵan qorǵanshylarǵa.
14) Qyzyl Juldyz aýylynda turatyn oqýshylarǵa oqý jyly kezeńinde.
15) Sotsıalıstik Eńbek erlerine jáne «Qazaqstannyń Eńbek Eri» ataǵy bar adamdarǵa jeńildik beriledi.
