1 qarashadan bastap keıbir jolaýshy poıyzdary kún saıyn júre bastaıdy

NUR-SULTAN. QazAqparat - Qazaqstanda keıbir jolaýshylar poıyzy kún saıyn júretin boldy, dep habarlaıdy QazAqparat «Jolaýshylar tasymaly» AQ baspasóz qyzmetine silteme jasap.

Atap aıtqanda, №4/3 «Nur-Sultan - Nurly jol - Almaty-2» poıyzy 1 qarashadan bastap Nurly jol vokzalynan, 2 qarashadan bastap Almatydan kún saıyn jóneltiledi.

Sonymen qatar №68/67 «Nur – Sultan - Nurly jol – Óskemen-1» poıyzy da 1 qarashadan bastap Nur-Sultannan, 2 qarashadan bastap Óskemennen kún saıyn júre bastaıdy.

Jolaýshylar poıyzdarynyń qozǵalys kestesi boıynsha barlyq aqparatty «105» nómirine habarlasyp bilýge bolady.

Ulttyq tasymaldaýshy jolaýshylardan bıletti onlaın, sonyń ishinde resmı bilet.railways.kz saıtynan satyp alýyn, sanıtarlyq-karantın talaptaryn, áleýmettik qashyqtyqty, vokzal aýmaǵynda jáne poıyz ishinde betperde rejımin qatań saqtaýyn suraıdy.

Sondaı-aq, saparǵa shyǵar kúni bılet bolmaǵan jaǵdaıda «Kútý paraǵy» atty tegin qyzmetti paıdalanýǵa bolatynyn eske salady.