1 qarashadan bastap Qazaqstanda aıaq kıimdi tsıfrlyq tańbalaý engiziledi
NUR-SULTAN. QazAqparat - Qazaqstanda aıaq kıimdi mindetti tsıfrlyq tańbalaý 2021 jylǵy 1 qarashadan engiziletin bolady, dep habarlaıdy QazAqparat.
«Mundaı sheshim sala ókilderimen ótkizilgen keńes nátıjeleri boıynsha qabyldandy. 2021 jylǵy 1 qarashadan bastap tańbalanbaǵan aıaq kıimdi óndirýge jáne elimiz aýmaǵyna ákelýge tyıym salynady. Al bólshek saýda bıznesinde tańbalanbaǵan taýarlardyń qaldyqtaryn satý úshin 2022 jyldyń 1 qarashasyna deıin qosymsha merzim bar», - delingen Tsıfrlyq ekonomıkany damytý ortalyǵy baspasóz qyzmetiniń málimetinde.
Budan buryn mindetti tsıfrlyq tańbalaý 2021 jyldyń shildesinde engiziledi dep josparlanǵan bolatyn, alaıda kóptegen ımporttaýshylar kúz-qys maýsymyna sheteldik óndirýshilerden aldyn ala jarty jylǵa erte taýarlarǵa tapsyrys beredi. Sondyqtan kóktemde tapsyrys berilgen tańbalanbaǵan aıaq kıimniń Qazaqstan shekarasyn 1 shildege deıin ótpeı qalý qaýpi týyndaǵan bolatyn.
«Endi naryqta jańa normalarǵa muqııat daıyndalý úshin taǵy bes aı jáne tańbalanbaǵan taýarlardyń qaldyqtaryn satý úshin bir jyldan astam ýaqyt bar. Bıznes úshin táýlik boıy tsıfrlyq tańbalaý boıynsha jedel jeli jumys isteıdi. Tsıfrlyq ekonomıkany damytý ortalyǵy únemi mamandandyrylǵan vebınarlar ótkizedi, sala ókilderine jeke keńester beredi. Aıaq kıimdi tsıfrlyq tańbalaý týraly paıdaly aqparat markirovka.kz portalynda bar. Sondyqtan árbir kásipkerdiń naryqtaǵy jumystyń jańa erejelerine muqııat daıyndalý múmkindigi men ýaqyty bar», - deıdi Tsıfrlyq ekonomıkany damytý ortalyǵynyń bas dırektory Bıkesh Qurmanǵalıeva.
Mindetti tsıfrlyq tańbalaýdy engizýge keden qoımalary da daıyndalýda. Qoıma aýmaǵynda kedendik rásimder kezinde sheteldik zaýyttarda tańbalanbaǵan taýarǵa Data Matrix tsıfrlyq kody bar stıkerler nemese etıketkalar ornatylatyn bolady.
Esterińizge sala keteıik, taýarlardy tsıfrlyq tańbalaý – bul EAEO deńgeıinde júzege asyrylatyn ultaralyq joba. Aıaq kıim salasy elimizde mindetti tsıfrlyq tańbalaý engiziletin alǵashqy salalardyń biri. Mundaı sheshim naryqtaǵy kontrafaktilik deńgeıin eskere otyryp qabyldandy. QR QM Memlekettik kirister komıtetiniń derekteri boıynsha aıaq kıimniń kóleńkeli naryǵy jalpy kólemniń shamamen 48,5%-yn quraıdy. Aıaq kıimniń tsıfrlyq tańbalanýy naryqty kontrafaktiden tazartýǵa yqpal etedi. Sonymen qatar, atalǵan shara qoǵamdyq baqylaýdy kúsheıtýge múmkindik beredi. Naqty Onim mobıldi qosymshasy arqyly tutynýshylar tańbalanǵan taýardyń túpnusqalyǵyn ońaı teksere alady.
