1 qarashadan bastap Astanada aılyq jol júrý bıletiniń quny 5 800 teńge bolady
ASTANA. 3 qazan. QazAqparat - 2013 jyly 1 qarashada qalalyq jolaýshylar kóliginde aılyq jol júrý bıletiniń quny 5 800 teńgeni, balalar úshin 900 teńgeni quraıdy. Bul týraly astana.kz saıtyna qalalyq Jolaýshylar kóligi jáne avtomobıl joldary basqarmasynan haabarlady.
«Qazirgi aılyq jol júrý bıletiniń quny 2008 jyly qyrkúıekte belgilengen. Osy ýaqytqa deıin jolaýshylar kóligi kásiporyndary qalalyq marshrýttarǵa paıdalaný úshin jalpy quny 6,5 mlrd teńgeden astamdy quraıtyn 305 jańa avtobýs satyp aldy. Munymen qosa, JJM, qosalqy bólshekter men materıaldar baǵasy 1,5 eseden artyq ósken. Sol sebepti kásiporyndar júrgizýshilerge tıisti jalaqy tóleı almaı otyr. Osyǵan baılanysty elordada qalalyq kólik júrgizýshileriniń sany azaıǵan. Qazirgi ýaqytta jolaýshylar kóligi kásiporyndarynda júrgizýshiler bolmaǵandyqtan kún saıyn 80-nen astam avtobýs jolǵa shyqpaıdy. Bul belgilengen qozǵalys kestesiniń buzylýyna ákeledi»,- delingen aqparatta.
Osyǵan oraı, kásiporyn basshylary Astana qalasy máslıhatynyń qurylys, ekologııa, kólik, saýda jáne turǵyn úı-kommýnaldyq sharýashylyq máseleleri jónindegi turaqty komıssııasyna ótinish jazǵan. Komıssııa ujymdyq ótinishti qarap shyǵyp, Jolaýshylar kóligi jáne avtomobıl joldary basqarmasyna qalalyq qoǵamdyq kóliktiń kóp rettik jol júrý bıletiniń (aılyq, balalarǵa arnalǵan) baǵasyn kóterý máselesin qarastyrýdy usyndy.
«1 qarashadan bastap aılyq jol júrý bıletiniń qunyn 5800 teńgege, balalar úshin 900 teńgege deıin kóterý týraly sheshim qabyldandy», - delingen vedomstvo aqparatynda.
