1 qarashada Astanadan Pavlodarǵa ushaq qatynaı bastaıdy

ASTANA. QazAqparat – 1 qarashadan bastap «Astana-Pavlodar» baǵytynda tikeleı áýe reısteri qatynaı bastaıdy. Bul týraly Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat.

«Memleket basshysynyń Pavlodar oblysyna jumys saparynyń qorytyndysy boıynsha «Astana-Pavlodar» baǵytynda tikeleı áýe reısterin ashý tapsyrylǵan bolatyn. Osyǵan oraı QR Indýstrııa jáne ınfraqurylymdyq damý mınıstrliginiń Azamattyq avıatsııa komıteti tıisti jumystardy júrgizdi.

Nátıjesinde bıylǵy jyldyń 1 qarashasynan bastap «Qazaq Air» avıakompanııasy aptasyna 4 ret jıilikpen áleýmettik mańyzy bar «Astana-Pavlodar» avıamarshrýtyn oryndaı bastaıdy», - delingen habarlamada.

Atalǵan baǵyttaǵy bılet baǵasy – 10 myń teńge. Bıletterdi satý búgingi kúnniń sońyna deıin bastalady.

Eske salaıyq, bıylǵy 5 qazanda Pavlodar oblysynyń jurtshylyǵymen kezdesýde Prezıdent Qasym-Jomart Toqaev Astanadan atalmysh óńirge tikeleı avıareıs ashýdy tapsyrǵan bolatyn.

«Pavlodar oblysynyń ekonomıkasyn damytýǵa ózge óńirlermen áýe qatynasyn ornatý aıryqsha yqpal etetini anyq. Qazir oblys ortalyǵynan Astananyń ózine tikeleı ushaq ushpaıdy. Úkimet jyl sońyna deıin «Pavlodar – Astana» baǵytyndaǵy turaqty áýe qatynasyn qalpyna keltirýi kerek. Sondaı-aq jergilikti áýejaıdyń ushý-qoný jolaǵyn jóndeý máselesin pysyqtaǵan jón», - degen bolatyn Memleket basshysy.