1 qańtardan eńbekke jaramsyzdarǵa áleýmettik kómek tólenedi
ASTANA. QazAqparat - Eńbekke jaramsyz músheleri bar otbasylarǵa jumyspen qamtý ortalyqtarynan aqshalaı tólemder beriledi. Búgin Úkimet úıindegi baspasóz máslıhatynda Eńbek jáne halyqty áleýmettik qorǵaý vıtse-mınıstri Svetlana Jaqypova osylaı málim etti, dep habarlaıdy QazAqparat.
2018 jyldyń 1 qańtarynan bastap ataýly áleýmettik kómek kórsetý túrlenetinine toqtalǵan ol: «Ataýly áleýmettik kómektiń eki túri jumyspen qamtý ortalyqtary qyzmetkerlerimen iske asyrylady. Birinshisi - ol eńbekke jaramdy adamdary joq otbasylarǵa aqshalaı kómekke qatysty. Bul sharalar óz kezeginde eshbir talapsyz, áleýmettik shartsyz atqarylady», - dedi.
Osy oraıda Svetlana Jaqypova atalǵan kómekke qatysty mysal keltirdi.
«Eger de balany tárbıelep otyrǵan jalǵyzbasty ana bolsa, onda oǵan atalǵan járdemaqy tólenedi. Jumyspen qamtý ortalyǵynyń qyzmetkeri bul áıelge áleýmettik tirkeý kartasyn ashady jáne onyń kiristerin eseptep shyǵarady. Sodan keıin áleýmettik kómekti taǵaıyndap, tóleıdi. ıAǵnı bul jeńildetilgen tártip bolyp sanalady ári ol eshbir talaptarsyz tólenedi», - dep túsindirdi vıtse-mınıstr.
