1 qańtardan elektrondy shot-faktýralardy jazyp berýde salystyrmaly baqylaý engiziledi

ASTANA. KAZINFORM – 2026 jyldyń 1 qańtarynan elimizde elektrondy shot-faktýralardy jazyp berýdi salystyrmaly baqylaý engiziledi. Bul týraly Memlekettik kirister komıtetiniń Táýekel-menedjment basqarmasy basshysynyń orynbasary Ernar Taýbekov aıtty.

- Elektrondy shot-faktýralardy kameraldy baqylaý 2019 jyldan beri salyq organdary qoldanyp kele jatqan tetik sanalady. Kelesi jyldan bastap kameraldy baqylaý joıylyp, elektrondy shot-faktýralardy jazyp berýdi salystyrmaly baqylaý engiziledi. Jalpy, bıýdjetti jáne Ulttyq qordy qalyptastyrýdyń bir bóligi sanalatyn, zańmen belgilengen salyqtar men tólemder tóleý ol - memleketimizdiń Konstıtýtsııasy boıynsha árbir azamattyń konstıtýtsııalyq boryshy. Sol sebepti eldiń ekonomıkalyq qaýipsizdigin qamtamasyz etý maqsatynda salyq organdary salyq zańnamasynyń saqtalýyn qamtamasyz etý sharalaryn qabyldaıdy, - dedi ol komıtette ótken baspasóz máslıhatynda.

Ernar Taýbekovtyń atap ótýinshe, jańa Salyq kodeksin ázirleý barysynda jalǵan elektrondy shot-faktýralar jazyp berýge jol bermeýge baǵyttalǵan salyqtyq ákimshilendirýdiń túrli tásilderi qarastyrylǵan. Onyń ishinen elektrondy shot-faktýralardy jazyp berýdi salystyrmaly baqylaý tańdap alynǵan.

- Buryn biz habarlamany joldaǵannan keıin salyq tóleýshilerdiń habarlamany oryndaý merzimi 30 jumys kúnin quraıtyn. Endi ol 10 jumys kúnine qysqartyldy. Onyń sebebi 30 jumys kúniniń ishinde jalǵan kásipkerlik kórinisi bar salyq tóleýshiler ózderiniń zańsyz áreketterin jalǵastyra beredi. 30 jumys kúni degenimiz 45 kúntizbelik kúnge teń. Osy aralyqta olar biraz shot-faktýra jazyp úlgeredi. Sol sebepti osyndaı zańsyz áreketterdi boldyrmaý úshin 10 jumys kúnine qysqarttyq. Eger habarlama joldanǵannan keıin salyq tóleýshi habarlamamen kelisken jaǵdaıda kórsetilgen shot-faktýralardy keri qaıtarý arqyly oryndaıdy nemese kelispegen jaǵdaıda sol habarlamada kósretilgen shot-faktýralar boıynsha taýarlar men jumystardy jazý arqyly qujattaryn jáne túsiniktemelerin salyq organdaryna ákep tapsyrady. Sol tapsyrylǵan qujattardy qaraý merzimi 5 jumys kúnine uzartyldy, - dedi komıtet ókili.

Onyń degerinshe, osy jyldyń 10 aıynda jalǵan shot-faktýralar jazý belgileri bar 3100 salyq tóleýshi anyqtalǵan. Olardyń jalpy qarjy aınalym somasy 1 trln teńgege jýyqtaıdy.

- Biz habarlamany oryndaý merzimin qysqartqan jaǵdaıda bul soma áldeqaıda tómen bolar edi. ıAǵnı, biz habarlama joldaǵannan keıin olardyń 45 kúni bar. Osy 1,5 aıdyń ishinde salyq tóleýshi kúnine bir jalǵan shot-faktýranyń 100 mln teńgege jazyp bergenniń ózinde 4,5 mlrd teńge shyǵady. Jalpy, salyq tóleýshiler mundaı habarlamaǵa jaýap bermeıdi. Sebebi, jaýapty mamandary joq. Dırektorynyń ne quryltaıshysynyń sharýashylyq qyzmetke qatysy bolmaıdy. eshqandaı shot-faktýra attarynan jazylmaǵan. Olar belgisiz tulǵalardyń atynan ashylǵan mekeme. Sol tulǵalardyń tsıfrlyq qoltańbasyn qoldaný arqyly jalǵan shot-faktýralar jazyp beredi, - dedi Ernar Taýbekov.

Buǵan deıin Jańa Salyq kodeksi aıasynda tabys, kólik jáne múlik salyǵyna qandaı ózgeris engiziletinin jazǵan edik.