1 qańtardan bastap zeınetaqy aktıvterin basqarý tártibi ózgeredi
ASTANA. KAZINFORM — Qarjy naryǵyn retteý jáne damytý agenttigi «Qazaqstan Respýblıkasynyń keıbir normatıvtik quqyqtyq aktilerine baǵaly qaǵazdar naryǵy jáne zeınetaqymen qamsyzdandyrý máseleleri boıynsha ózgerister men tolyqtyrýlar engizý týraly» 2025 jylǵy 16 qazandaǵy № 67 qaýlyny qabyldady.
— Qaýlyda 2026 jylǵy 1 qańtardan bastap basqarýshy kompanııalardyń qyzmetin baǵalaý júıesiniń ortasha saralanǵan nátıjelerden kompozıttik ındekster (benchmarktar) boıynsha baǵalaýǵa ótýi kózdelgen. Kompozıttik ındekster qazaqstandyq qor naryǵynyń jáne álemdik qarjy alańdarynyń ındeksterin qamtıdy, bul jahandyq ekonomıkalyq úrdisterdi eskere otyryp, basqarý nátıjelerin obektıvti baǵalaýǵa múmkindik beredi, — delingen Qarjy naryǵyn retteý jáne damytý agenttiginiń habarlamasynda.
Sonymen qatar, basqarýshy kompanııalardyń táýekel deńgeıi, kiristiligi jáne ınvestıtsııalaý merzimi boıynsha erekshelenetin ınvestıtsııalyq strategııalardy usyný múmkindigi kózdelgen. Bul salymshylarǵa jeke qalaýy men ruqsat etilgen táýekel deńgeıin basshylyqqa ala otyryp, tıisti ınvestıtsııalyq beıindi derbes tańdaýǵa, sondaı-aq zeınetaqy aktıvterin ár túrli ınvestıtsııalyq strategııalary bar túrli basqarýshylarǵa basqarýǵa berý arqyly ártaraptandyrýǵa múmkindik beredi.
— Qaýlyda zeınetaqy aktıvterin ınvestıtsııalaý úshin qoljetimdi qarjy quraldarynyń tizbesi keńeıtildi, sondaı-aq árbir ınvestıtsııalyq strategııanyń erekshelikterin eskere otyryp, ınvestıtsııalaýdyń tıisti lımıtteri belgilendi. Bul basqarýshy kompanııalarǵa portfeldi ártaraptandyrýǵa jáne ınvestıtsııalyq táýekelderdi azaıtýǵa kóbirek múmkindikter beredi, — delingen habarlamada.
Basqarýshy kompanııanyń zeınetaqy aktıvterin Ulttyq bankiniń basqarýyna erikti túrde qaıtarý múmkindigi qosymsha kózdelgen.
— Qabyldanǵan sharalar zeınetaqy aktıvteriniń uzaq merzimdi kiristiliginiń ósýine, basqarýdaǵy ashyqtyq pen ıkemdiliktiń artýyna, sondaı-aq jeke basqarýshylar arasynda básekelestik ortanyń qurylýyna ákeledi dep kútilýde, bul negizinde zeınetaqy aktıvterin tıimdirek ınvestıtsııalaýǵa yqpal etedi, — delingen habarlamada.
Qaýlynyń tolyq mátinimen agenttiktiń ınternet-resýrsynan tanysýǵa bolady.